Një qytetar nga komuna e Ferizajt është arrestuar nga Policia e Kosovës pasi kishte përdor revolen në një aheng familjar, duke paraqitur kështu rrezik për komunitetin.
Sipas njoftimit për media, Policia e stacionit në Ferizaj me datën 15 korrik rreth orës 23:30 ka pranuar një informacion se në rrugën ‘’Vëllezërit Gërvalla” në një aheng familjar kishte të shtëna me armë të zjarrit.
Policët e rendit menjëherë janë nisur në atë drejtim dhe kanë identifikuar të dyshuarin A.B, 44 vjeçar, tek i cili është gjetur edhe arma e zjarrit me të cilën dyshohet se ka shtënë në ajër.
“I dyshuari A.B është shoqëruar në stacionin e policisë në Ferizaj dhe pas intervistimit nga policët hetues, me vendim të prokurorit kujdestar nga Prokuroria Themelore në Ferizaj është ndaluar në mbajtje për 48 orë për procedura tjera hetimore, ndërsa si provë materiale është sekuestruar arma e zjarrit ( pistoletë)”, thuhet në njoftim.
Sipas policisë, rasti është cilësuar “Përdorim i armës apo mjetit të rrezikshëm” dhe “Mbajtje në kontroll ose posedim i paautorizuar i armës” .
Me këtë rast policia rajonale e Ferizajt falënderon qytetarët për bashkëpunim , ndërsa inkurajon edhe të tjerët që të bashkëpunojnë me policinë.
Ndryshe, Policia e Kosovës edhe këtë vit ka plasur fushatën “Festo me zemër e jo me armë” me qëllim mos-përdorimin e armeve nëpër ahengje.
