Marrëveshja paraprake ndërmjet Universitetit të Prishtinës dhe Ministrisë së Arsimit për ofrimin e 1000 eurove bursë vjetore për studentët që zgjedhin të studiojnë në programet Gjuhë ose Letërsi Shqipe të Fakultetit të Filologjisë në Universitetin e Prishtinës “Hasan Prishtina”, ka rezultuar pozitive, pasi këtë vit numri ka arritur mbi 100 kandidatë.
Lindita Sejdiu-Rugova, dekane e Fakultetit Filologjik, për RTKlive u shpreh se bursa e ofruar për studentët që zgjedhin të studiojnë në këto dy programe ka qenë një motiv që ka rezultuar pozitivë për t’i kthyer të rinjtë më shumë nga shkencat kombëtare.
“Ne do të duhej që së paku kulturën dhe gjuhën tonë ta trajtojmë pak më ndryshe, por kjo nuk do të thotë se këtë duhet ta bëjmë gjithmonë vetëm me stimulim financiar. Në këtë moment ka pasur nevojë për një stimulim të tillë, por ndoshta kjo e kthen interesimin e njerëzve për këto fusha, por edhe cilësinë e studimeve që ofrohen në këto fusha. Dhe në të ardhmen natyrisht do të duhej të orientohemi jo vetëm tek mësimdhënia e këtyre fushave, por edhe te hulumtimi dhe studimi më i thellë me metoda bashkëkohore”, tha Sejdiu-Rugova.
Ajo shpjegoi se studentët që do të jenë përfitues të bursave do të monitorohen nëse po zhvillojnë studimet në mënyrë të rregullt.
“Këto bursa nuk do të jepen ashtu siç po mendohet, se e përfiton bursën dhe nuk do të shkojë në mësim. Do të ketë monitorim dhe do të propozohen kandidatët përfitues. Sipas marrëveshjes që e kemi nënshkruar thuhet se numri i bursave dhe shpërndarja në programe do të bëhet me vendim të veçantë të ministres secilin vit”, shtoi dekania e Filologjikut.
Sejdiu-Rugova tutje theksoi se as tash dhe as në ardhmen nuk e sheh rrezik për shuarjen e këtyre dy programeve, edhe pse e pranoi se ka pasur mungesë të interesimit. Megjithatë, sipas saj kjo nuk është diçka e veçantë vetëm për Kosovë, pasi me të njëjtin problem ballafaqohen edhe vendet e tjera të rajonit.
“Gjithmonë në afatin e parë në qershor në Gjuhë dhe Letërsi nuk kanë aplikuar shumë studentë, pasi numri ka shkuar deri në 60-70 aplikues, mirëpo ka pasur një periudhë ku kemi pasur atë gjeneratën e madhe të numrit të madh të maturantëve, ku numri ka shkuar deri në 120-130. Pastaj, ka pasur një rënie, por nuk ka qenë vetëm te Gjuha Shqipe, por edhe në Gjuhën Angleze”, tha ajo.
Vlera Sadiku, aplikuese në programin Gjuha Shqipe, për RTKlive tha se arsyeja pse ka zgjedhur të studiojë në këtë program ka qenë se kjo degë mund t’ia hapë dyert në karrierën diplomatike dhe për punë në organizata ndërkombëtare.
“Qëllimet e mia janë që përmes studimit të gjuhë shqipe të thellohem në kuptimin dhe lidhjen me kulturën dhe gjuhën e popullit tim”, tha ajo.
Sadiku tutje theksoi se bursa nuk ka qenë shtysë për të, por sipas saj një gjë e tillë është e mirëseardhur.
Ndërsa, Anita Istogu, studente e vitit të katërt në programin Gjuhë Shqipe, theksoi se studentët që mendojnë të regjistrohen në këto dy programe duhet ta duan këtë drejtim dhe pastaj do ta kenë shumë të lehtë për të studiuar.
“Letërsia Shqipe është një degë shumë dimensionale dhe studimi i saj u ofron studentëve shumë mundësi për shkak se ne duhet ta dimë vlerën edhe të autorëve të territoreve shqipfolëse. Tendencat e viteve të fundit janë leximi i letërsisë botërore dhe i autorëve të huaj, por kemi edhe autor shqiptarë të cilët janë të mrekullueshëm dhe të cilët paraqesin tek lexuesit një botë ndryshe, e cila vërtetë meriton të lexohet, të studiohet dhe të kultivohet si kulturë shqiptare”, tha ajo.
Ajo tutje shtoi se shumë të rinj mendojnë se në rast se studiojnë Gjuhën dhe Letërsinë Shqipe kontributi i tyre në të ardhmen do të jetë i kufizuar vetëm në mësimdhënie, por sipas saj studentët që studiojnë këto degë mund të punësohen në shtëpi të ndryshme botuese, nëpër media si redaktor, si lektor, si gazetar, si dhe në punë administrative për shkak të njohjes dhe drejtshkrimit shqip.
Departamenti i Gjuhës dhe i Letërsisë Shqipe këtë vit ka hapur gjithsej 60 vende për pranimin e studentëve në këto dy degë, ku prej tyre 50 janë për komunitetin shqiptarë dhe 10 për komunitetin pakicë.
