Në një takim të përbashkët Agjencia Kadastrale e Kosovës, ministri i Mjedisit, Planifikimit Hapësinor dhe Infrastrukturës Liburn Aliu dhe kryetarët e të gjitha komunave të Kosovës nënshkruan një memorandum bashkëpunimi, i cili synon regjistrimin e afërsisht 70 mijë objekteve që shtrihen në një sipërfaqe prej 113 mijë hektarësh, të cilat më parë nuk kanë qenë të regjistruara në kadastër.
Ministri Aliu theksoi se kjo marrëveshje do të thjeshtojë procedurat për qytetarët në fushën e legalizimit të objekteve, duke e bërë këtë proces më të lehtë dhe më ekonomik për ta. Ai shpjegoi se projekti i rindërtimit të kadastrit do të përfshijë matjen e të gjitha objekteve pa leje, duke përfshirë edhe ndërtesat kolektive, gjë që do të sjellë një lehtësim të madh për qytetarët.
“Na pret një punë e madhe e përbashkët dhe jemi të gatshëm për bashkëpunim të mëtejshëm me kryetarët e komunave. Na intereson të kemi një sistem sa më efikas,” tha Aliu.
Avni Ahmeti, Drejtori i Përgjithshëm i Agjencisë Kadastrale të Kosovës, sqaroi se me këtë projekt, 70 mijë objekte do të maten pa pagesë, duke kursyer një buxhet të konsiderueshëm. Ahmeti theksoi se vetëm shërbimet gjeodezike për një objekt kushtojnë rreth 150 euro, dhe në total, kursimet për qytetarët do të arrijnë në rreth 10 milionë euro.
“Projekti përfshin një sipërfaqe prej 113 mijë hektarësh dhe 70 mijë objekte në 114 zona kadastrale. Për të realizuar suksesshëm këtë projekt na duhet bashkëpunimi me secilin kryetar të komunave”, tha Ahmeti.
