Në 26 vjetorin e rënies së luftëtarëve të UÇK-së në bjeshkën “Rrasa e Zogut”, luftëtarë të lirisë nga Peja, Istogu dhe Skenderaj, në Junik është organizuar Akademi Përkujtimore.
Nga prita e organizuar e forcave serbe në bjeshkët e Junikut në mëngjesin e hershëm të 17 korrikut 1998, gjatë kthimit me armatim, ranë rreth 40 ushtarë të UÇK-së, ku vetëm 11 prej tyre janë identifikuar, ndërsa mbetën të plagosur mbi 200 të tjerë.
“Gjithçka shkoi mbarë sipas planit deri në mesnatë kur grupi ra në pritë tek “Rrasa e Zogut”, në ora dy pas mesnate. Në luftime mbetën të vrarë rreth 40 ushtarë të UÇK-së e qindra të plagosur”, ka thënë Beqir Kiqina, historian.
“Meqë kolona ishte e madh, afro 1000 veta, një pjesë e marrin drejtimin e Koshares ndërsa pjesa tjetër në drejtim të Rrasës së Zogut. Në ora dy të natës arrijnë te përroi i madh që për fat të keq kishte qenë i minuar në të dy anët i përforcuar nga forcat serbe”, ka thënë Ruzhdi Shehu, kryetar i Junikut
“Me të marrë lajmin se një numër i madh i ushtarëve të UÇK-së janë plagosur, unë si udhëheqës i Spitalit ushtarak në Junik kam mobilizuar ekipen time mjekësore dhe gjatë 3- 4 dite në vazhdim kemi arritur t’iu ofrojmë ndihmë 38 ushtarëve të plagosur në këtë depërtim. Asnjë i plagosur nuk ka vdekur në spitalin tonë”, ka thënë Dr. Ali Kuçi, mjek i UÇK-së.
Me këtë rast kryetari i Junikut, Ruzhdi Shehu, për familjarët e dëshmorëve, në shenjë respekti e nderimi, ndau mirënjohje. Ndërkaq që u dha ideja që në vend-rënien e tyre të ngrihet pllakë përkujtimore.
