Ministri i Punëve të Brendshme, Xhelal Sveçla, ka pritur sot në takim Sekretarin e Ministrisë së Brendshme Federale të Gjermanisë, Bernd Krosser, i cili ishte i shoqëruar nga Ambasadori i Gjermanisë në Kosovë, Jorn Rohde dhe ekipi i tij.
Zyra për Komunikim Publik e Ministrisë së Punëve të Brendshme përmes një komunikate për media njofton se Ministri Sveçla diskutoi për sigurinë e përgjithshme në Kosovë, veçanërisht në komunat veriore. Dhe me këtë rast, ai ka shprehur shqetësimin për mos dorëzimin para drejtësisë të terroristëve që realizuan sulmin terrorist në Banjskë dhe strehimin që po ua bën Serbia, si një kërcënim i vazhdueshëm për sigurinë e Republikës së Kosovës.
Sipas komunikatës Sekretari Krosser diskutoi për Procesin e Berlinit, ku Republika e Kosovës mbetet palë aktive e këtij procesi. U diskutua po ashtu edhe Ministeriali i radhës i Ministrave të Brendshëm në kuadër të Procesit të Berlinit.
Tutje në komunikatë thuhet se të dyja palët u dakorduan për bashkëpunim të mëtejmë, si garancë e sigurisë në rajon por edhe më gjerë.
Ndryshe Ministri Sveçla i ka uruar mirëseardhje në Ministrinë e Brendshme Sekretarit Krosser dhe me këtë rast shprehu mirënjohjen për mbështetjen e vazhdueshme të Gjermanisë për institucionet e Republikës së Kosovës, dhe ka prezantuar të arriturat në fushën e sigurisë, veçanërisht në luftën ndaj krimit të organizuar, kontrabandës, migrimit të parregullt dhe çdo ilegaliteti tjetër, duke theksuar se këto të arritura janë edhe falë mbështetjes së partnerëve tanë të cilët kanë kontribuar në ngritjen dhe forcimin e institucioneve të sigurisë.
Edhe Sekretari Krosser falënderoi Ministrin për pritjen dhe përgëzoi për të arriturat. /Kosovatimes/
