Në një bisedë përmes një lidhje direkte në magazinën “Lajmet e fundit” në RTK, analisti Seb Bytyqi komentoi rëndësinë e pjesëmarrjes së Kosovës në Samitin e Komitetit Politik Evropian.
Ai theksoi se ky samit ofron një mundësi të mirë për forcimin e lidhjeve të Kosovës me shtetet tjera dhe për promovimin e interesave të saj në arenën ndërkombëtare.
Bytyqi sqaroi se, ndonëse në këtë samit nuk diskutohet për të drejta anëtarësimi apo çështje shumë të rëndësishme, është një forum ku Kosova ka të drejtat e saj sikurse shtetet tjera pjesëmarrëse. Ai vuri në dukje se, pas luftës në Ukrainë, ka pasur lëvizje të konsiderueshme në forcimin e integrimit evropian, me Moldavinë dhe Ukrainën që kanë avancuar në statusin e kandidatit për BE-në.
Megjithatë, Bytyqi theksoi se aplikacioni i Kosovës për statusin e kandidatit ende nuk është shqyrtuar, situatë të cilën ai e konsideron diskriminuese.
“Është një padrejtësi që po i bëhet Kosovës, sepse Kosova është shteti i vetëm në Ballkan që nuk e ka këtë status dhe në raport me Serbinë në dialog, Kosova është më e diskriminuar dhe më e dëmtuar,” tha ai.
Bytyqi përmendi se është e nevojshme që, si pjesë e forcimit të unitetit të demokracive evropiane, Kosovës t’i jepet sa më shpejt statusi i kandidatit për në BE.
Bytyqi tha se mbajtja pezull e aplikacionit të Kosovës në BE është arsyeja për ta forcuar presionin mbi Kosovën në dialog, ashtu siç e kanë mbajtur pezull edhe liberalizimin e vizave për disa vite pas plotësimit të kushteve.
Sipas tij, kjo nënkupton që Kosova të bëjë kompromise në dialog.
