Skuadra e Malishevës është eliminuar nga Liga e Konferencës.
Pas fitores në ndeshjen e parë dhe debutuese në arenën evropiane kundër Buduçnostit në stadiumin “Zahir Pajaziti” në Podujevë, 1:0, skuadra e drejtuar nga Qëndrim Kida është mposhtur në Podgoricë, me rezultat bindës 3:0. Igor Ivanoviq e zhbllokoi rezultatin në minutën e 32-të. Epërsinë në 2:0 e shtoi Dragan Griviq, në minutën e 56-të, derisa rezultatin përfundimtar e vulosi Vladimir Perishiq, në minutën e 88-të.
Nga garat evropiane janë eliminuar edhe Tirana, Vllaznia dhe Shkëndija e Tetovës.
Tirana pësoi humbje në “Elbasan Arena” nga Torpedo Kutaisi 1:0, në rrethin e parë të Ligës së Konferencës. Ndeshja e parë në Gjeorgji javën e kaluar kishte përfunduar 1:1.
Para tifozëve të vet ka zhgënjyer edhe Vllaznia e Shkodrës, e cila ka humbur thellë në stadiumin “Loro Boriçi”, nga skuadra islandeze, Valur, me shifrat 4:0. Ndeshja e parë kishte përfunduar 2:2.
Humbje si vendase pësoi edhe Shkëndija e Tetovës, e cila në Shkup u mposht nga Noah e Armenisë, me rezultat 2:1. Ndeshja e parë ishte mbyllur 2:0.
