Shkruan: Bajram MJEKU
Shkelja e Kushtetutës në Kosovë, hiç më pak se dhjetë herë gjatë katër viteve të fundit, më kujton një detaj të diplomatit shqiptar, Faik Konica. Është edhe më neveritëse kur një deputet shkelë Kushtetutën në mënyrë të dyfishtë, pastaj brenda natës me një kërcim “epik” ndërron partinë politike dhe sa çel e mbyll sytë bëhet gardian i saj!
Në vitin 1913, diplomati shqiptar Faik Konica u kthye në Shqipëri për të ndihmuar pavarësinë e saj. Konica nuk pranoi të ishte pjesë e Qeverisë së Princ Vidit, pasi e dinte që ministrat shqiptarë, më shumë se për Shqipërinë punonin për interesa të fuqive të mëdha.
Kudo që shkonte, Konica fliste për nevojën e futjes së kulturës perëndimore në Shqipëri. I vëmendshëm se Shqipëria gjendej para momenteve më të rëndësishme në historinë e saj, kësaj radhe Konica gjatë turit nëpër Shqipëri nuk e ndillte Evropën, por nisi t’i ndillte shqiptarët që të ishin më të kujdesshëm ndaj saj.
I parakohshëm në vizione, Konica jo rrallë mbetej i vetmuar. Gjatë gjashtë muajve sa qëndroi në Shqipëri, ai u fokusua në një linjë të rëndësishme për shtetin shqiptar dhe nisi t’ua shpjegonte atyre modelet e qeverisjes së shteteve evropiane.
Një ditë, derisa u shpjegonte disa bejlerëve qeverisjen parlamentare angleze, njëri nga ata si të ishte zgjuar nga dremitja e pyeti:
– Allahile Faik Bej çka është kjo farë kushtetute?!
I prekur në sedër, Konica u përgjigj:
– Unë kam faj që humbas kohën me gomerë të këtillë!
