Gjykata më e lartë e Organizatës së Kombeve të Bashkuara, në opinion e dhënë të saj ka thënë se okupimi i territoreve palestineze nga Izraeli është në kundërshtim me ligjin ndërkombëtar.
Kryetari i kësaj gjykate, Nawaf Salam, ka thënë se kanë gjetur se ‘prania e vazhdueshme e Izraelit në Territorin e Pushtuar Palestinez është e paligjshme’.
Gjykata Ndërkombëtare e Drejtësisë ka thënë se Izraeli duhet të ndalojë aktivitetin rreth e ndërtimit të kolonive në Bregun e Okupuar Perëndimor dhe Jerusalemin Lindor dhe t’i jap fund okupimit të paligjshëm të këtyre zonave dhe Rripit të Gazës sa ma parë që është e mundur.
Izraeli duhet t’i evakuon gjithë kolonët e saj nga Bregu Perëndimor dhe Jerusalemi Lindor dhe të paguajë dëmshpërblimet palestinezëve për dëmet e shkaktuara nga okupimi. Izraeli, nga viti 1967, ka ndërtuar rreth 160 koloni apo vendbanime për rreth 700 mijë kolonë hebrenj në Bregun Perëndimor dhe Jerusalemin Lindor.
Përmes një deklarate ka reaguar kryeministri i Izraelit Benjamin Netanjahu i cili ka thënë se Gjykata ka marrë një vendim të gënjeshtrave. “Ligjshmëria e vendbanimeve izraelite gjithandej atdheut tonë nuk mund të kontestohet”, ka thënë në deklaratë Netanjahu..
Kjo gjykatë, sipas kërkesës së Asamblesë së Përgjithshme të OKB-s, e ka trajtuar këtë çështje që nga fillimi i vitit të kaluar. Nga Gjykata, në mënyrë specifike është kërkuar të japë opinionin e saj rreth politikave dhe praktikave të Izraelit kundrejt palestinezëve, si dhe mbi statusin ligjor të pushtimit.
Gjykata Ndërkombëtare e Drejtësisë selinë e ka në Hagë të Holandës ndërsa është nën juridiksionin e OKB-së. Opinionet e saj nuk janë ligjërisht të obligueshme megjithatë kanë peshë të rëndësishme politike.
