Presidenti francez Emmanuel Macron tha se ai synon të vizitojë Serbinë “në javët ose muajt e ardhshëm”, ku ai planifikon të finalizojë negociatat për kontratat ushtarake, duke përfshirë një marrëveshje për shitjen e avionëve Rafale në Beograd. Macron tha se kishte një bisedë “jashtëzakonisht të frytshme” me presidentin serb Aleksandar Vuçiç për çështjet ekonomike, të mbrojtjes dhe të energjisë në margjinat e samitit të Komunitetit Politik Evropian në Britaninë e Madhe.
“Çështjet ushtarake janë pjesë e agjendës sonë. Në javët apo muajt e ardhshëm, unë do të vizitoj Serbinë për të finalizuar ato diskutime që janë objekt i negociatave teknike, financiare dhe politike midis vendeve tona,” tha Macron në një konferencë për shtyp.
Macron i karakterizoi marrëdhëniet mes Parisit dhe Beogradit si “të qëndrueshme, të ndershme dhe strukturore për të dy vendet dhe për të gjithë rajonin”.
Vuçiq tha sot se takimin më të gjatë sot e ka pasur me Macron, me të cilin ka diskutuar për Kosovën dhe çështje të tjera të rëndësishme.
“Takim i rëndësishëm për të gjitha çështjet, nga gjeopolitika e deri te e ardhmja ekonomike e Serbisë, bashkëpunimi ushtarako-teknik dhe presim vizitën e tij në Beograd në fund të gushtit, më së voni në fillim të shtatorit”, tha Vuçiq.
