Sot janë përkujtuar dëshmorët Agim Çelaj, Sadik Shala, Afrim Krasniqi, Hamdi Berisha, Habib Berisha, Gani Paçarizi, Liman Gegaj, Ramadan Morina dhe Ruxhdi Gjyliqi, pjesëtarë të njësive të UÇK-së që kanë vepruar në Malishevë dhe që kanë rënë në ‘Betejën e Rahovecit’ në korrik të vitit 1998.
Përmes një njoftimi në faqen zyrtare të Komunës së Malishevës bëhet e ditur se homazhe janë bërë në vendet e rënies në Rahovec, në memorialet e ngritura për ta dhe në varrezat e dëshmorëve në Malishevë dhe Kleçkë.
Në këtë ceremoninë përkujtimore kanë marrë pjesë protagonistët dhe eprorët e lartë të UÇK-së, deputetë, personalitete të jetës politike dhe kulturore, familjarë, bashkëluftëtarë dhe qytetarë. Ndër ta ishin Fatmir Limaj (komandant Çeliku), Nait Hasani, Bekë Berisha, gjeneral Selim Krasniqi, kryetari i degës së OVL të UÇK-së në Malishevë Metush Kryeziu dhe përfaqësues të qeverisë komunale në Malishevë.
“Si çdo vit, edhe sot, 26 vite më pas, nderojmë e kujtojmë atë çfarë ka ndodhur në betejat e luftës sonë për liri. Kujtojmë ditët e vështira të asaj kohe, vuajtjet, dhimbjet dhe sakrificën e korrikut të vitit 1998. Mirënjohja është virtyti më i mirë që manifestohet çdo ditë. Shpresoj që gjeneratat që vijnë do të jetojnë me lavdinë e krenarinë për vendin tonë, për të cilin është dhënë shumë, si në kohën për liri ashtu edhe në epokën e shtetndërtimit,” ka thënë në fjalët e tij përkujtimore Fatmir Limaj.
Ndërsa kryetari i degës së OVL të UÇK-së në Malishevë, Metush Kryeziu, u shpreh se janë bërë 26 vite dhimbje, por edhe krenarie me veprën e tyre, pasi sot jetojmë të lirë falë sakrificës së këtyre dëshmorëve të kombit. /Kosovatimes/
