Ministri për Komunitete dhe Kthim Nenad Rashiq ka vizituar sot në Prizren fituesit e granteve në kuadër të projektit “Forcimi i komuniteteve përmes mbështetjes për ndërmarrjet e vogla dhe të mesme”.
“Qëllimi im është të inkurajoj pjesëtarët e të gjitha komuniteteve që të aplikojnë dhe të jenë pjesë e programit tonë, të punojnë dhe të zhvillojnë bizneset e tyre dhe të arrijnë rezultate të lakmueshme”, tha ministri Rashiq.
“Është më e rëndësishme që grantet të përfundojnë në duart e duhura”, theksoi ministri për Komunitete dhe Kthim Nenad Rashiq, i cili u shpreh i kënaqur me rezultatet e punës së fituesve të granteve në periudhën paraprake.
Ai shtoi se vizita te biznesmenët e komuniteteve multietnike në Prizren është një mënyrë për të treguar se përfaqësuesit e ministrisë qëndrojnë pas punës së tyre.
“Nuk është vetëm se është një moment ad hoc ku ne japim ca para dhe nuk e dimë se çfarë ka ndodhur me të”. Jo, kjo është diçka ndryshe, ne duam që të jetë një partneritet së bashku me ata që investojnë në atë program, investojnë veten, forcat e tyre fizike, shëndetin e tyre dhe i ndjekin në punën e tyre. Siç thotë edhe programi ynë, edhe në kontratën e tyre është shkruar që çdo vit tjetër, nëse dëshmojnë se i kanë bërë punët e duhura, mund të aplikojnë për zgjerimin e vendeve të punës nëse është e nevojshme”, tha ministri Rashiq.
Ministri Rashiq theksoi se Prizreni përveç se është multietnik, është edhe shembull i praktikës së mirë për sa i përket ndërmarrësisë, sepse biznesi familjar i bartet gjeneratave të ardhshme.
“Më pëlqen që rajoni ynë ka vlera të tilla kulturore si këtu, që kemi artizanë që vazhdojnë, siç dëgjuam sot, brezi i tretë, i katërt vazhdon punën. Ka të rinj që merren me mekanizim. Ka shumë kohë që nuk kam parë që të bëhet ndonjë punë brezash. Dëshiroj ta bart atë frymë entuziazmi te njerëzit tanë në Kosovë nëse ka rrugë, por jo vetëm rrugë por edhe shembuj”, tha ministri Rashiq.
Ministri Rashiq përkujtoi se ministria këtë vit ka filluar me më pak mjete, por shpreson që deri në fund të vitit të ketë tenderë të rinj për fuqizim dhe fillimin e bizneseve.
“Gjithçka duhet të zbatohet, edhe brenda institucioneve, por sigurisht kur të arrijë tek qytetarët si produkt final, më e rëndësishmja është që ata të përfitojnë prej saj”, ka shtuar Rashiq.
Ministri për Komunitete dhe Kthim e ka përfunduar vizitën në Prizren me një bisedë me përfaqësues të sektorit joqeveritar. /Kosovatimes/
