Policia spanjolle ka arrestuar tre “hakerë pro-rusë”, të cilët dyshohen se kanë kryer sulme kibernetike kundër Spanjës dhe vendeve të tjera anëtare të NATO-s për “qëllime terroriste”, shkruan Reuters , duke cituar Ministrinë e Punëve të Brendshme spanjolle. Sipas agjencisë së zbatimit të ligjit, të arrestuarit mund të përfshihen, ndër të tjera, në sulme DDoS ndaj burimeve të “institucioneve qeveritare dhe sektorëve strategjikë”.
Sulmet kibernetike dyshohet se janë kryer kundër faqeve të internetit të organizatave publike dhe private në sektorin qeveritar, infrastrukturën kritike dhe “shërbimet thelbësore” në vendet që mbështesin Ukrainën në luftën me Rusinë, shkruan gazeta.
“Këto sulme u organizuan nga grupi i hakerëve NoName057(16), i cili filloi aktivitetet e tij pas pushtimit të Ukrainës nga Rusia dhe që u bë një nga më aktivët ( ndër grupet e tjera pro-ruse të hakerëve – TMT). Në manifestin e tij themelues, grupi pranon se “do të japë një përgjigje proporcionale ndaj veprimeve armiqësore dhe haptazi anti-ruse të rusofobëve perëndimorë”, tha Ministria e Punëve të Brendshme spanjolle.
Policia nuk përmendi emrat e të arrestuarve ose nuk tha nëse ata janë akuzuar zyrtarisht. Në rrjetin social X, oficerët spanjollë të zbatimit të ligjit postuan një video të bastisjes në shtëpinë e njërit prej të dyshuarve. Pamjet tregojnë një flamur me një çekiç dhe drapër të varur në murin e shtëpisë së tij.
Arrestimet u kryen në Manacor në ishullin Majorca, si dhe në Huelva dhe Seville në Spanjën jugore. Hetimet për këtë rast janë duke vazhduar, tha policia.
Në fillim të majit, BE-ja dhe NATO-ja lëshuan një deklaratë të përbashkët duke thënë se Moska kishte kryer “aktivitete dashakeqe” në hapësirën kibernetike kundër Gjermanisë dhe Republikës Çeke. Bashkimi Evropian dhe aleanca dënuan rreptësisht “fushatën e sulmeve kibernetike” kundër Berlinit dhe Pragës zyrtare dhe kujtuan se më parë strukturat dhe agjencitë qeveritare në Poloni, shtetet baltike, Sllovaki dhe Suedi ishin subjekt i sulmeve të ngjashme kibernetike. Hakerët e grupit APT28 (Fancy Bear), të lidhur me shërbimet e inteligjencës ruse, u emëruan përgjegjës për sulmet. Në të njëjtën kohë, aleanca premtoi të kundërshtojë kërcënimet e sigurisë kibernetike kolektivisht dhe individualisht, dhe gjithashtu siguroi se veprime të tilla nga Moska nuk do t’i detyronin aleatët të refuzonin ndihmën për Ukrainën.
Në fund të majit, Sekretari i Përgjithshëm i NATO-s, Jens Stoltenberg tha se NATO mund të përdorë Nenin 5 të Traktatit të Atlantikut të Veriut nëse Rusia kryen sulme kibernetike në shkallë të gjerë kundër një prej vendeve të aleancës. Sipas nenit të pestë të NATO-s, në rast të një sulmi ndaj një prej vendeve anëtare të bllokut, partnerët e tjerë të aleancës duhet ta konsiderojnë këtë një sulm ndaj të gjithë Aleancës së Atlantikut të Veriut. Për të ndihmuar, ata marrin të drejtën për të ndërmarrë veprime “të konsideruara të nevojshme”, përfshirë ato ushtarake.
