Një pjesë e madhe e mediave kanë raportuar mbi periudhën e fundit të Lionel Messit në Barcelonë dhe mundësinë e transferimit të tij te Manchester City.
Mirëpo, sipas librit “God Save Pep” nga Martí Perarnau, Messi dëshiroi të bashkohej me Manchester City dhe kontaktoi Pep Guardiolën për një transferim të mundshëm gjatë verës së vitit 2020. Megjithatë, ishte Guardiola që kishte dyshime nëse Messi do të ishte në gjendje të përshtatej me intensitetin e stërvitjeve në Angli, teksa problem sipas tij paraqiste edhe mosha e tij.
Në një takim në shtëpinë e Guardiolës në Barcelonë, Messi shprehu gatishmërinë për t’u stërvitur fort dhe për të përballuar çdo sfidë, por Guardiola mbeti skeptik. Një faktor tjetër pengues ishte klauzola e lartë e largimit prej 750 milionë eurosh në kontratën e Messit me Barcelonën, gjë që e bënte transferimin të vështirë për t’u realizuar, theksohet në libër.
Si rrjedhojë Messi përfundimisht qëndroi te Barcelona deri në përfundimin e sezonit 2020-21, pas të cilit ai kaloi te Paris Saint-Germain, ku luajti për dy sezone para se të transferohej te Inter Miami në vitin 2023. Ndërkaq, këtë verë Messi fitoi edhe një trofe – atë të ‘Copa America’ me Kombëtaren e Argjentinës.
