Lulzim Krasniqi, zëdhënës i KEDS-it, i ftuar në emisionin e mëngjesit “Mirëmëngjesi Kosovë” në Radio Telvizionin e Kosovës, njoftoi më shumë rreth aplikimit të taksës për shkyçje për ata që s’paguajnë energjinë elektrike. Ai theksoi se taksa për rikyçje s’është gjobë, por lidhet me çështje operacionale.
Ai tha se falje sa i përket energjisë elektrike nuk ka pasur kurrë sepse është një afat ligjor brenda të cilit konsumatori detyrimisht duhet ta paguajë atë obligim të pagesës së faturës, por se ajo që ka ndodhur tani është aplikimi i një takse prej 15 eurosh e që me TVSh shkon në 17.70 euro. Fjala është për kategori që nuk e kryejnë pagesën brenda afatit ligjor.
Tutje ai shtoi se në momentin kur një konsumator është subjekt i shkyçjes për shkak të mospagesës së faturës së energjisë elektrike për muajin paraprak ai do të pranojë në faturën e radhës një vërejtje me shkrim ku specifikohen detaje se jeni subjekt i shkyçjes dhe detyrimisht nëse vjen deri te shkyçja e që nuk e paguani faturën brenda afatit ligjor sa parashihet në faturë sepse në secilën faturë parashihet deri kur ka afat pagesa e saj, atëherë ai konsumator shkyçet.
Ai theksoi se kjo, para së gjithash, nuk është dënim sepse KEDS-i nuk dënon, nuk gjobit, po kjo është një taksë e cila ka të bëjë me çështje operacionale. Pra një punëtor i KEDS-it, në vend se t’i kryejë detyrat dhe përgjegjësitë e tij brenda ditës që i takojnë, ai duhet të shkojë edhe të shkyçë një numër të caktuar të konsumatorëve që janë të papërgjegjshëm.
KEDS-i ditë më parë ka njoftuar se nga 1 gushti do të fillojë aplikimin e taksës për shkyçje të konsumatorëve që nuk e paguajnë borxhin brenda afatit ligjor.
