Shumë mërgimtarë tanimë kanë nisur rrugën drejt vendlindjes për pushimet verore. Por, sikur për çdo vit ata vazhdojnë të përballen me pritje dhe kolona nëpër kufij. Vetëm te Dheu i Bardhë pritjet janë të gjata deri në dy orë për të hyrë në Kosovë, ndërsa në Merdar pesë deri në dhjetë minuta.
Fluks i ardhjes së mërgimtarëve u pa edhe gjatë së mërkurës.
Një nga bashkatdhetarët tanë që erdhi në Kosovë përmes pikëkalimit te Dheu i Bardhë është edhe Sadat Hyseni. Ai thotë se për të hyrë në Kosovë kishte pritur deri në 1 orë.
“Një orë këtu, një orë në Hungari dhe një në Serbi. Tri orë gjithsej”, tha Hyseni.
Por në krahasim me vitin e kaluar, mërgimtarët thonë se këtë radhë kishin pritur më pak.
“Kemi me qëndru mbi tri javë, nuk kemi pritë edhe shumë gjatë, një orë”, tha Dafina Haziri, bashkatdhetare nga Gjermania.
Pritje kishe edhe për të dalë nga Kosova. Megjithatë, bashkatdhetarët të cilët i përfunduan pushimet e tyre në Kosovë tregojnë se si i kaluan ato.
”Unë jam nga Prizreni, shumë mirë kemi kaluar. Tash po shkojmë..”, tha një bashkatdhetar.
Kolona e veturave për të hyrë në Kosovë ishte deri në 90 metra ndërsa në dalje shkuan deri në 600.
Në pikëkalimet e tjera kufitare, sipas Qendrës Kombëtare për Menaxhimin kufitar, nuk është raportuar për fluks të mërgimtarëve.
