Universitetit “Isa Boletini” në Mitrovicë ka mirëpritur riakreditimin e tetë programeve nga Agjencia Kosovare e Akreditimit (AKA) duke e konsideruar si hap pozitiv për studentë kosovarë.
“Të gjitha programet e Universitetit “Isa Boletini” në Mitrovicë (UIBM), tetë sosh, për të cilat është aplikuar për riakreditim në AKA kanë marrë përgjigje pozitive. Në UIBM e mirëpresin këtë akreditim, duke qenë se tani do të mund të pranohen studentë në të gjitha këto programe dhe të tjerat që kanë pasur akreditim”, thuhet në njoftimin e Zyrës për Informim të UIBM-së.
Sipas njoftimit janë riakredituar pesë programe në nivelin baçelor: 1. Juridiku (3 vjet), Gjeologjia (5 vjet), Inxhinieri Ekonomike (3 vjet), Inxhinieri Mekanike (Makineri Prodhuese) (3 vjet), si dhe Materiale dhe Metalurgji (3 vjet).
“Ndërsa në programin master janë riakredituar tri programe: Materiale dhe Metalurgji (3 vjet), Hidrologji dhe Gjeologji Inxhinierike (3 vjet), si dhe Inxhinieri dhe Teknologji Ushqimore në nivelin master (5 vjet)”.
Rektorja e UIBM, Nurten Deva ka përgëzuar bartësit dhe të gjitha grupet që kanë qenë pjesë e procesit të riakreditimit të këtyre programeve.
“Është bërë një punë e jashtëzakonshme nga të gjitha njësitë akademike dhe grupet e përfshira në procesin e akreditimit të programeve, duke marrë përgjigje pozitive për të gjitha”, tha ajo.
“Në konkursin e shpallur më 18 korrik 2024, ka nisur aplikimi në programet që kishin akreditim duke përfshirë edhe ato që ishin riakredituar në ndërkohë, ndërsa së shpejti pritet të hapet konkursi edhe për programin: Materiale dhe Metalurgji, në nivelin baçelor”, thuhet në njoftimin e Zyrës Për Informim të UIBM-së.
Ky universitet thuhet se ofron programe atraktive për të rinjtë që duan të studiojnë, ofron kushte të jashtëzakonshme në një kampus modern.
