Pas përplasjes së djeshme pozitë-opozitë në Asamblenë e Komunës së Gjakovës, lidhur me mungesën e oksigjenit në Urgjencën e Qendrës Kryesore të Mjekësisë Familjare dhe raportin e auditorit, ka vazhduar edhe sot përplasja, ku është kërkuar edhe shkarkimi i drejtoreshës së Shëndetësisë.
Një përplasje ndërmjet pozitës dhe opozitës në Kuvendin e Gjakovës ka vazhduar edhe sot. Asamblistët e Vetëvendosjes i kanë kërkuar edhe një herë kryetarit Ardian Gjini që ta shkarkojë drejtoreshën për Shëndetësi, Adelina Shehu Kola, për keqmenaxhim në drejtorinë e saj.
“Ne dje në mbledhjen e asamblesë e kemi kërkuar shkarkimin e drejtoreshës pikërisht për mënyrën e keqe të menaxhimit të QKKM -së dhe urgjencës në këtë rast”, tha Shqipe Daija Fejza, nga Qendra e Vetëvendosjes në Gjakovë.
“Siç e dini, raporti i auditorit e qet komunën tonë të kualifikuar duke e ndëshkuar me miliona, gjë që sigurisht e paguajnë qytetarët e komunës sonë, andaj po të shohësh në gjetjen e auditorit në secilën gjetje komuna pajtohet. Atëherë si ka mundësi që kryetari i komunës, komuna, qeverisja lokale të pajtohet me gjetjet në raport, ndërsa kur vjen puna në vend që të kërkojë zgjidhje, ai kërkon fajtorin të imagjinuar sepse fajin kryesor e ka keqmenaxhimi i kryetarit të komunës”, tha asamblistja e VV-së Mimoza Shala.
Kryetari i Gjakovës Ardian Gjini, tha se kualifikimi i raportit të auditorit vjen për shkak të lobimeve nga njerëz brenda komunës.
“A mundeni me besu këtë, edhe këtu më qesin lot krokodili për dy boca të oksigjenit në autoambulancë që janë. Kanë lobu për me na u kualifiku raporti, çka dmth me u kualifiku raporti me i humbë Gjakova diku edhe 1.5 milion”, deklaroi Gjini.
Ndërkaq, kritikat e opozitës ai i quajti absurde.
“A po e kuptoni tash pse e kanë lëshu sallën, a për oksigjen a? E kanë lëshu sallën që s’kanë dashtë me ndejtë në këtë pikë. Qysh mundeni me bë kështu , qysh mundeni me ja bë Gjakovës kështu. I shkruajnë Ministrisë së Financave, i thojnë mos i merr paret tjetërkund se kemi mjaftueshëm te pagat edhe meditjet. Kolegë tanë këtu e disa zyrtarë që janë të komunës së Gjakovës janë shku me lobu me na kualifiku raportin”, shtoi tutje Ardian Gjini.
E drejtoresha Adelina Shehu Kola ripërsëriti se në Urgjencën e QKMF-së në Gjakovë, ka oksigjen të mjaftueshëm.
