Për të gjithë ata që nuk kanë pasur mundësinë të udhëtojnë në Paris për të ndjekur Lojërat Olimpike, Komiteti Olimpik i Kosovës (KOK) ka bashkëpunuar me komunën e Prishtinës dhe RTK-në që qytetarët të mund të ndjekin garat në sheshin “Zahir Pajaziti”, ka njoftuar KOK.
Aty po mbahet Festivali Olimpik #Prishtina2024.
“Derisa mbrëmë ceremonia hapëse e Festivalit Olimpik, kaloi në atmosferë mbresëlënëse, e njëjta pritet të jetë sonte (21:00) kur bokson Donjeta Sadiku, dhe në ditët në vijim kur garojnë sportistët tanë.
Krahas ndjekjes së garave, fëmijët mund të argëtohen edhe me sporte të ndryshme.
Mbrëmë ceremoninë e hapi anëtarja e Bordit Ekzekutiv të KOK-ut, Vjollca Krasniqi, derisa pjesëmarrës ishin edhe përfaqësues të MKRS-së dhe ambasadorë të shteteve të huaja.
Me nga një fjalë rasti të pranishmëve iu drejtuan edhe drejtori i DS në MKRS, Ibër Alaj dhe ambasadori i Francës, Olivier Guerot”, ka theksuar KOK.
