Ministria e Punëve të Jashtme të Shtetit të Izraelit sot njoftoi se janë identifikuar emrat e 11 nga 12 fëmijët e vrarë pas sulmit të kryer nga Hezbollahu në fushën e futbollit Majdan Shams në qytetin me shumicë të komunitetit Druze.
“Fëmijët e vrarë nga Hezbollahu janë: Alma Ayman Fakhr al-Din (11 vjeçe), Naji Taher Halabi (11 vjeç), Millar Maadad al-Shaar (10 vjeç), Fajr Laith Abu Salah (16 vjeç), Amir Rabii Abu Salah, (16 vjeç), Hazem Akram Abu Salah (15 vjeç), Yazan Naif Abu Salah (12 vjeç), John Wadie Ibrahim (13 vjeç), Izil Nashat Ayoub (12 vjeç), Finis Adham Safadi (12 vjeç), Nazem Fakher Saeb (16 vjeç)”, bën të ditur Ministria e Jashmte izraelite.
Siç njofton edhe “Times of Israel”, dymbëdhjetë fëmijë dhe adoleshentë u vranë kur një raketë goditi një fushë futbolli në qytetin verior Druze pasditen e djeshme. Forcat Mbrojtëse të Izraelit njoftuan se raketa ishte një Falaq-1 e prodhuar nga Irani me një kokë lufte prej mbi 50 kilogramë eksplozivë.
Banorët dhe reaguesit e parë përshkruan skenat e masakrës së përgjakshme në fushën e futbollit. Megjithëse kishte rënë një sirenë paralajmëruese, ishte një alarm shumë i shkurtër për viktimat, të cilët nuk mundën të iknin në kohë.
