Komisioni për përzgjedhje të kandidatëve për anëtarë të Bordit Drejtues të FKPK-së i propozoi Kuvendit dy kandidatë për emërim.
Kandidatët që dërgohen në kuvend janë Ali Vitija dhe Arsim Bruçaj.
Komisioni për përzgjedhje të kandidatëve për anëtarë të Bordit Drejtues të FKPK-së, për pozitën anëtar me përvojë profesionale në përfaqësimin ose këshillimin e punëdhënësve në Kosovë dhe për pozitën anëtar me përvojë profesionale në përfaqësimin ose këshillimin e punonjësve apo përfaqësuesve të tyre në Kosovë, i përbërë nga Guvernatori i BQK-së, Auditorja e Përgjithshme dhe Ministri i Financave, Punës dhe Transfereve, i propozoi Kuvendit për emërim dy kandidatë për anëtarë të Bordit Drejtues të FKPK-së.
“Për pozitën anëtar me përvojë profesionale në përfaqësimin ose këshillimin e punëdhënësve, kanë aplikuar 13 kandidatë, prej të cilëve 6 kandidatë i janë nënshtruar intervistës. Edhe për pozitën anëtar me përvojë profesionale në përfaqësimin ose këshillimin e punonjësve apo përfaqësuesve të tyre, kanë aplikuar 13 kandidatë, prej të cilëve 6 kandidatë i janë nënshtruar intervistës”, thuhet në njoftim.
Komisioni bazuar në intervistimin e kandidatëve dhe kryerjes së verifikimeve të nevojshme, unanimisht vendosi që, konform Ligjit për Fondet Pensionale, dy kandidatët e vlerësuar me më së shumti pikë të procedohen tek Kuvendi për emërim për anëtarë të Bordit Drejtues të FKPK-së.
“Për pozitën anëtar me përvojë profesionale në përfaqësimin ose këshillimin e punonjësve apo përfaqësuesve të tyre propozohet: kandidati Ali Vitija, i vlerësuar me më së shumti pikë nga intervistimi (22.3 pikë nga 30 pikë), kurse për pozitën anëtar me përvojë profesionale në përfaqësimin ose këshillimin e punëdhënësve propozohet: kandidati Arsim Bruçaj, i vlerësuar me më së shumti pikë nga intervistimi (24.7 pikë nga 30 pikë)”, thuhet në njoftim. /Kosovatimes/
