Kryetari i Aleancës për Ardhmërinë e Kosovës, Ramush Haradinaj, ka takuar sot përfaqësuesit e shoqatave të dala nga lufta me të cilët kanë diskutuar për situatën e rëndë të pjesëtarëve të kategorive të lirisë.
Kështu ka bërë të ditur vetë Haradinaj përmes një postimi në llogarinë e tij në Facebook.
“I shqetësuar tej mase me situatën e rënduar të pjesëtarëve të kategorive të lirisë. Të dhënat që sot u prezantuan nga përfaqësues të shoqatave të dala nga lufta, në një tryezë të organizuar nga Aleanca për Ardhmërinë e Kosovës, flasin për një situatë alarmante. Veteranët me paga qesharake, invalidët pa asistencën e nevojshme shëndetësore, familjet e dëshmorëve në harresë totale”, ka thënë Haradinaj.
Haradinaj ka shtuar se Aleanca do të jetë e vendosur që ta rikthejë dinjitetin e luftëtarit, të veteranit, të invalidit por edhe të familjeve të dëshmorëve të lirisë.
“Kjo shoqëri duhet që urgjentisht ta rikthejë dinjitetin e kategorive të lirisë, pjesëtarët e të cilave janë më meritorët për lirinë që e gëzojmë sot. Aleanca do të jetë e vendosur që ta rikthejë dinjitetin e luftëtarit, të veteranit, të invalidit por edhe të familjeve të dëshmorëve të lirisë. Ata që e harrojnë të shkuarën, rrezikojnë që ajo t’u përsëritet”, është shprehur Haradinaj.
