Deputeti i LDK-së, Driton Selmanaj, ka thënë se kryeministri Albin Kurti e ka hallin te rezultati i zgjedhjeve dhe jo te ankesat e minatorëve, të cilët kanë njoftuar se nuk i kanë marrë pagat që nga qershori. Sipas tij, Kurti ka dështuar në realizimin e premtimeve të tij për ndërmarrjen Trepça.
Në Facebook, Selmanaj ka shkruar se Kurti ka premtuar që në Trepçë do të riparohen kapacitetet ekzistuese, të futet teknologjia e re, të shtohet prodhimi dhe hulumtimi, si dhe të shtohet kualifikimi i punëtorëve. Ai thekson se kjo nuk u realizua “ndonëse 64.26% e qytetarëve të Mitrovicës e votuan”.
“Në të gjitha këto premtime DËSHTOI! Ndërsa sot, kur minatorët jetojnë në kushte të tmerrshme dhe ende nuk i kanë marrë pagat e dy muajve, Albin Kurti i premton vetes se në vitin 2025 do të fitojë edhe më shumë vota se në vitin 2021. Ky nuk e ka hallin e minatorëve dhe të kësaj shoqërie, por tek rezultati i zgjedhjeve që do mbahen së shpejti”, ka shkruar Selmanaj.
