Kandidati republikan për zgjedhjet presidenciale në SHBA, Donald Trump, e cilësoi si “turp” ceremoninë e hapjes së Lojërave Olimpike (OI) në Paris, veçanërisht pjesën me transvestitë.
“Unë jam shumë mendjehapur, por mendova se ajo që ata bënë ishte një turp”, tha ish-presidenti amerikan në një intervistë për Fox News.
Kur u pyet se çfarë lloj ceremonie hapjeje do të dëshironte të shihte në Lojërat Olimpike të Los Anxhelosit në vitin 2028 nëse bëhet president, Trump u përgjigj se me siguri nuk do të ketë një “Darka e Fundit” si të premten në Paris.
Një skenë me transvestitë rreth një tavoline që të kujton pikturën e Leonardo da Vinçit “Darka e Fundit” shkaktoi zemërim nga e djathta ekstreme në Francë dhe Itali, si dhe disa të krishterë.
Shumë e gjykuan atë skenë si një tallje të krishterimit dhe Jezu Krishtit.
Drejtori artistik i ceremonisë së hapjes, Thomas Jolly, tha pas kritikave se nuk donte të tallej me askënd dhe se “Darka e Fundit” nuk ishte frymëzimi i tij për skenën e kritikuar.
“Mendoj se ishte mjaft e qartë që Dionisi po vinte në atë tryezë. Ai është aty, sepse është zot i festës dhe i verës…”, tha Joli.
“Doja të bëja një ceremoni që i rregullon gjërat dhe pajton. Gjithashtu që ripohon vlerat e Republikës sonë (Franceze)”, tha Joly.
