Krahas PDK-së dhe AAK-së edhe Lidhja Demokratike e Kosovës ka kërkuar që datë e zgjedhjeve të rregullta të jetë 26 janari 2025. Një gjë të tillë e ka bërë të ditur kryetari i këtij subjekti politik, Lumir Abdixhiku.
“Meqë, sipas përcaktimeve të afateve kushtetuese, në dispozicion na u ofruan katër data, ato të 26 janarit, 2 shkurtit, 9 shkurtit e 16 shkurtit; dhe në vijë me bindjet politike të Lidhjes Demokratike – se vendit i duhet sa më parë një Qeveri e re, që parandalon zhbërjen e shtetit, shëron polarizimin shoqëror, rikthen orientimin pro-perëndimor e fokusohet në zhvillim e mirëqenie qytetare, propozova datën 26 janar 2025 si datë të zgjedhjeve të ardhshme. Zgjedhjet për LDK-në janë gjithmonë festë!”, ka shkruar Abdixhiku në Facebook.
Ai tutje ka thënë se zgjedhjet vijnë si manifestim i demokracisë, si rikthim tek qytetari e si vlerë e shtetit. “Ato na vijnë në një moment kritik të vendit, të gjeneratave të tashme dhe atyre që vijnë. Prandaj dhe përbashkimi i së djathtës sot është thirrje për shpëtim! E ardhmja është e bukur. Lidhja është gati!”, ka shkruar tutje kreu i LDK-së.
Pas takimit me liderët e partive politike, presidentja Vjosa Osmani ka deklaruar se datën e shpalljes së zgjedhjeve do ta caktojë pas një analize të të gjitha datave që janë në dispozicion. /Kosovatimes/
