Zëvendëskryeministri Besnik Bislimi e ka uruar Ardita Sinanin për zgjedhjen kryetare e Preshevës.
Në rrjetin social “Facebook” Bislimi ka shkruar se me Sinanin bashkëpunimi do të jetë i pandashëm dhe shqiptarët tani do të kenë mundësinë të njohin ndryshime pozitive e të prekshme për Preshevën.
“Në zgjedhjet e fundit Presheva zgjodhi në krye të komunës Ardita Sinanin, të cilën e përgëzoj për fillimin e marrjes së detyrës. Qytetarët atje treguan një vullnet të qartë politik dhe të modelit me anë të të cilit duan ta shohin komunën e tyre duke u qeverisur”, ka shkruar ai.
Bislimi ka thënë se bashkëpunimi do të jetë i pandashëm dhe së bashku do të angazhohen maksimalisht që të hapin mundësi të reja për t’i ndihmuar bashkëkombësit atje.
“Është thelbësore ta garantojmë mbrojtjen e të drejtave të njeriut dhe t’i përmirësojmë kushtet socio-ekonomike dhe politike për të gjithë shqiptarët në rajon. Vetëm përmes përpjekjeve të përbashkëta do të mund t’i tejkalojmë sfidat dhe të ndërtojmë një të ardhme më të mirë për të gjithë.
Andaj, ky është një moment i rëndësishëm për shqiptarët e Preshevës, të cilët përmes udhëheqjes së Arditës do të kenë mundësi të njohin ndryshime pozitive dhe të prekshme në Preshevë”, ka shkruar Bislimi. /Kosovatimes/
