Oda Ekonomike e Kosovës ka nënshkruar një marrëveshje bashkëpunimi me Rrjetin e Bizneseve të Diasporës Shqiptare në Zvicër, për hapjen e Zyrës së Diasporës në kuadër të Odës Ekonomike të Kosovës, që do të shërbejë si urë lidhëse mes bizneseve vendore dhe atyre në diasporë.
Zyra do të shërbejë për të gjithë prodhuesit kosovarë, të rinjtë dhe të rejat e Kosovës që kanë ide inovative, për të kërkuar partnerë e bashkëpunëtorë biznesi në diasporën e Kosovës.
Kryetari i Odës Ekonomike të Kosovës, Lulzim Rafuna, pas ceremonisë së nënshkrimit, u shpreh i gëzuar që po hapet edhe një derë e bashkëpunimit mes bizneseve brenda në Kosovë dhe atyre jashtë Kosovës.
“Diaspora është promotor i zhvillimit ekonomik të vendit, një potencial i jashtëzakonshëm për investime në Republikën e Kosovës. Prandaj, angazhimi i Odës dhe lidhjet tuaja janë thelbësore për krijimin e mundësive të reja për zhvillimin e ekonomisë tonë”, u shpreh Kryetari Rafuna në ceremoninë e nënshkrimit të marrëveshjes.
Ndërsa Kryetari i Bordit të Rrjetit të Bizneseve të Diasporës Shqiptare në Zvicër, Fehmi Fetahi, u shpreh se “beson fuqishëm që ky bashkëpunim do të sjell vlera të vërteta për të gjithë dhe do të kontribuojë për një të ardhme më të ndritur për Republikën e Kosovës”.
Zyra do të inaugurohet gjatë muajit gusht, në selinë e Odës Ekonomike të Kosovës në Prishtinë. /Kosovatimes/
