Të paktën pesë kundërshtarë të regjimit rus dhe një i ri i dënuar për tradhti, të gjithë të burgosur në Rusi, thuhet se janë transferuar në destinacione të panjohura ditët e fundit, duke nxitur spekulimet për një shkëmbim të mundshëm të afërt të të burgosurve.
Gjyqësori rus ka dënuar dhjetëra njerëz me burgime të gjata për kundërshtimin e Kremlinit dhe ofensivës ushtarake kundër Ukrainës, dhe Perëndimi kërkon lirimin e tyre.
Në Rusi, transferimi i të burgosurve bëhet kryesisht në kushte jo transparente dhe mund të duhen disa javë para se të dihet se ku janë dërguar.
Ndoshta ata po planifikojnë një shkëmbim të burgosurish
Por është një fakt i pazakontë që kaq shumë njerëz të burgosur në vende të ndryshme po zhvendosen në të njëjtën kohë, sipas agjencisë France Presse.
Prandaj, disa vëzhgues spekulojnë mbi mundësinë që një shkëmbim i të burgosurve që përfshin përfaqësues të opozitës ruse dhe amerikanë të ndaluar në Rusi është duke u përgatitur. “Duket se jemi në agimin e një shkëmbimi shumë të rëndësishëm (dhe jo vetëm me amerikanët),” shënoi në Telegram Tatjana Stanovaja, një politologe e pavarur në mërgim.
Kremlini normalisht nuk komenton statusin e shkëmbimeve të mundshme të të burgosurve, të cilat zakonisht shpallen pa njoftim.
“Ne nuk bëjmë asnjë koment për këtë temë,” tha zëdhënësi Dmitry Peskov.
Shtetet e Bashkuara dhe Rusia thanë se po diskutonin në mënyrë aktive shkëmbimin e gazetarit amerikan Evan Gershkovich, i dënuar në fillim të këtij muaji me 16 vjet burg për akuzat për spiunazh, duke shkaktuar zemërim nga Shtëpia e Bardhë.
Presidenti Vladimir Putin, ndërkohë, ka sugjeruar se dëshiron lirimin e Vadim Krasikov, një rus i burgosur në Gjermani për vrasjen e një ish-komandant rebel çeçen, për të cilin një gjykatë gjermane vendosi se ishte urdhëruar nga Moska.
