Kryetari i Bashkimit të Sindikatave të Pavarura të Kosovës, Atdhe Hykolli, priti në takim Specialistin e Lartë të ILO-s për Aktivitetet e Punëtorëve, Magnus Berge.
Përfaqësuesi i Zyrës së ILO-s për Evropën Qendrore dhe Lindore, Berge, në takimin tejet konstruktiv që u zhvillua në selinë e BSPK-së u interesua për aktivitetet e BSPK-së ndërlidhur me gjendjen e punëtorëve në Kosovë dhe shpalosi strategjitë e ILO-s me synim të përfshirjes së BSPK-së në aktivitetet e ILO-s.
Kryetari Hykolli, ngriti çështjen e Sigurisë dhe Shëndetit në Punë; të Përafrimit të legjislacionit me standardet ndërkombëtare; të Dialogut social në mes partnerëve socialë – Qeveri, punëdhënës, punëtor; të Ngritjes së kapaciteteve profesionale; po edhe të Monitorimit dhe vlerësimit të rezultateve të projekteve që ILO ka nisur dhe planifikon të nisë në Kosovë.
“Në takim theks i veçantë u vu në detyrimet ligjore të partnerit social, Qeverisë përkitazi me Konstitutimin e Këshillit Ekonomiko-Social, me nënshkrimin e marrëveshjes së përgjithshme kolektive, po edhe për gjetjen e rrugës së duhur legale të anëtarësimit të BSPK –së në ILO. Magnus Berge shprehu falënderim të veçantë për kryetarin Hykolli dhe për gjithë punën që BSPK-ja si gardiani i vetëm konfederativ në vendin tonë bën për ruajtjen dhe avancimin e të drejtave të punëtorëve në Kosovë”, njofton BSPK. /Kosovatimes/
