Kryeministri i Republikës së Kosovës, Albin Kurti, mori pjesë mbrëmjen e sotme në pritjen e organizuar nga Ambasada e Zvicrës me rastin e Ditës Kombëtare. Në fjalën e tij, Kurti e quajti Zvicrën një aleat kyç dhe falënderoi për mbështetjen e palëkundur ndaj Kosovës gjatë viteve, veçanërisht për strehimin e refugjatëve gjatë luftës dhe gjenocidit në vend.
Kurti theksoi se marrëdhëniet mes dy vendeve janë intensifikuar dhe zgjeruar në fusha të ndryshme, përfshirë sigurinë, ku përmendi vendosjen e misionit Swisscoy dhe rolin e rëndësishëm të Agjencisë Zvicerane për Zhvillim në nxitjen e zhvillimit të qëndrueshëm në bujqësi.
Ai gjithashtu vlerësoi mbështetjen e Zvicrës për anëtarësimin e Kosovës në organizata ndërkombëtare, si Këshilli i Evropës, dhe për rritjen e shkëmbimeve tregtare, ku eksportet drejt Zvicrës janë rritur me 26% në pesë vitet e fundit.
Kryeministri përmendi edhe mbajtjen e takimit të parë të grupeve parlamentare të miqësisë Kosovë-Zvicër dhe vizitat e shpeshta të delegacioneve kosovare në Zvicër, që kanë ndihmuar në thellimin e marrëdhënieve dhe në rritjen e kontakteve me diasporën kosovare atje.
Ai përmendi me krenari zgjedhjen e Islam Alijaj, zviceranit të parë me origjinë shqiptare, si pjesë e Këshillit Kombëtar të Zvicrës, duke nënvizuar kontributin e rëndësishëm të diasporës në jetën shoqërore dhe politike të Zvicrës. /Kosovatimes/
