Zëvendëskryeministri i Sllovakisë, Tomáš Taraba , ka shpallur bojkotimin e ceremonisë së mbylljes së Lojërave Olimpike 2024 në Paris për shkak të atyre që ai thotë se janë “simbole të neveritshme të dekadencës devijuese” të shfaqura gjatë ceremonisë së hapjes, shkruan POLITICO.
Taraba, i cili është anëtar i Partisë Kombëtare Sllovake (SNS) të ekstremit të djathtë dhe aktualisht shërben si ministër i mjedisit, u trondit nga performanca ekstravagante përgjatë lumit Seine. Ai u ofendua veçanërisht nga përshkrimet e drag queens dhe një njeriu të pikturuar në blu që përfaqëson Bacchus, perëndinë greke të verës, i shtrirë në një tabaka me ushqim, duke nxitur kritika nga organizatat e krishtera në Francë, SHBA dhe Rusi.
Kritikët e konsideruan këtë përshkrim si një fyerje për pikturën e njohur Darka e Fundit. Organizatorët e Lojërave Olimpike kërkuan falje, duke pretenduar se nuk ishte qëllimi për të ofenduar krishterimin. Thomas Jolly , drejtor artistik i ngjarjes, i tha rrjetit francez të lajmeve 24-orëshe BFM se performanca nuk kishte për qëllim të ofendonte. “Performanca kurrë nuk kishte për qëllim të tallte apo përçmonte dikë”, tha Jolly.
Forcat e djathta në vend
“Unë duhej të përfaqësoja Sllovakinë në ceremoninë e mbylljes”, ka shkruar Taraba. “Por këto Olimpiada do të mbahen mend përgjithmonë në botën normale për abuzimin me bukurinë e sportit dhe shndërrimin e tij në teatër politik progresiv. Për këtë arsye kam vendosur të mos marr pjesë në ceremoninë e mbylljes”. – transmeton Anadolu Ajansı .
Reagimi i Tarabës vjen në kontekstin e skenës politike në Sllovaki, ku Partia Kombëtare Sllovake e ekstremit të djathtë është pjesë e qeverisë së koalicionit të kryesuar nga kryeministri Robert Fico . Fico, i cili dikur ishte anëtar i Partisë Komuniste të Çekosllovakisë, ka mbajtur qëndrime nacionaliste, pro-ruse dhe antiperëndimore në dekadën e fundit, duke tërhequr mbështetje nga forcat e ekstremit të djathtë në vend.
