Sot ka diplomuar gjenerata e 60 e Policisë së Kosovës. Në këtë ceremoni ka marrë pjesë kryeministri i Kosovës, Albin Kurti, por edhe personalitete të larta shtetërore dhe ndërkombëtare, familjarë të zyrtarëve policorë dhe eprorë të Policisë së Kosovës.
Kryeministri Kurti tha se këtë vit policia shënon 25-vjetorin e themelimit të saj.
“Jam shumë i lumtur që nga 448 kadetë, çdo e pesta është grua dhe nga sot e tutje ato do të marrin titullin e zyrtareve policore. Sikurse në çdo gjeneratë tjetër edhe sot diplomojnë kadetë nga radhët e komuniteteve që jetojnë në Kosovë ndërsa është hapur konkursi i veçantë poashtu për komunitete në Policinë e Kosovës”, tha ai.
Kryeministri Kurti theksoi se kur kemi marrë detyrën si qeveri, buxheti për Policinë e Kosovës ka qenë 91 milionë euro, kurse sot është gati 50 % më i lartë, 135 milionë euro e, si rezultat i tij, kushtet e punës të pjesëtarëve të Policisë së Kosovës janë më të mira.
“Policia shënon moment të rëndësishëm falë qëndresës dhe përkrahjes së familje tuaja, si Qeveri s’do të ndalemi së mbështeturi Policinë e Kosovës. Misionin për vendin tonë e kemi të përbashkët, çdo sfidë e çdo sukses do të kalojmë bashkë”, shtoi ai.
“Brenda periudhës trevjeçare kemi investuar afër 17 milionë në pajisje policore logjistike, tre milionë në rregullimin dhe ndërtimin e objekteve policore, 7.8 milionë në blerjen e 320 automjeteve e autoblindave të reja. Nga sot ju jeni vlerë e shtuar e policisë dhe garanci e sigurisë për qytetarët tanë”, shtoi Kurti.
Drejtori i Policisë së Kosovës, Gazmend Hoxha, tha se 448 kadetët nga sot i bashkohen Policisë së Republikës së Kosovës.
“Si çdo gjeneratë e kaluar, edhe kjo gjeneratë, për të arritur në këtë ditë, ka kaluar nëpër sfida të ndryshme gjatë trajnimit, por falë punës, angazhimit të pakursyer, ka arritur me sukses të finalizojë dhe të kurorëzojë këtë të rëndësishme për Policinë e Kosovës”, tha ai.
Ndërkaq ministri i Punëve të Brendshëm i Kosovës, Xhelal Sveçla, ka thënë se profesionalizmi dhe shërbimi me përkushtim i policëve tanë, “të cilëve nga sot i bashkoheni edhe ju kadetë, kanë arritur ta ngrehin Policinë e Kosovës në institucionin me besimin më të madh qytetar”.
