Kryeministri i Republikës së Kosovës Albin Kurti, i shoqëruar nga ministra të kabinetit qeveritar, sot kanë zhvilluar një vizitë pune në Maqedoninë e Veriut.
Rreth kësaj vizite ka folur në “Info Plus”, në RTK, Melazim Koci, njohës i zhvillimeve politike, i cili tha se pavarësisht temave tjera që ishin në tryezën e bisedimeve ka dominuar rasti i zonjës Osmani.
Koci tha kryeministri maqedonas ka shfaqur keqardhje dhe në formë kurtuazie ka ofruar vetveten që ta shoqëroj presidenten në aeroport në raste tjera të tilla.
“Nuk është e rëndësishme fare nëse ka qenë udhëtim komercial ose jo. Ka mundur të jetë udhëtim komercial, nuk e përjashtoj mundësinë, por kjo nuk e zhvesh presidenten nga atributi i postit të saj”, tha Koci.
Sipas tij një vizitë e tillë, qoftë edhe transit, nuk mund të bëhet nëse shteti pritës nuk informohet paraprakisht.
“Maqedonia ka qenë paraprakisht e informuar për kalimin transit të presidentes nga aeroporti i Shkupit, kjo është e sigurt sepse ndryshe çdo shtet e ka të drejtën ta refuzojë palën tjetër. Për faktin që refuzimi nuk ka ndodhë do të thotë se ata kanë qenë të informuar që presidentja do të kalojë pavarësisht në çfarë cilësie do të udhëtonte”, tha ai.
Koci shtoi se kërkesa që Presidentja e Republikës së Kosovës Vjosa Osmani, të dorëzoj telefonin, është skandaloze, duke theksuar se në telefonin e një presidenti cilido qoftë ai mund të ketë sekrete shtetërore të cilat sipas tij nuk mund ti dorëzohen policisë së një shteti tjetër, madje ai tha që as policisë së vendit.
Tutje Koci tha se Kryeministri i Republikës së Maqedonisë Veriore, Hristijan Mickoski shfaqi keqardhje por nuk kishte kërkim-falje.
“Skandal është gjithsesi, dhe është e pakapshme kërkimi i telefonit të presidentes që ta dorëzojë telefonin të policia e një shteti tjetër”, tha ai.
Koci u shpreh se nuk është shumë optimist që do të mbahet trendi i mëparshëm i raporteve Kosovë-Maqedoni.
