Katër persona u vranë sot në një sulm ajror të ISRAEL-it në qytetin Majfadun në jug të Libanit, njoftuan shërbimet shëndetësore dhe të sigurisë, dhe në të njëjtën ditë palestinezë u vranë edhe në Bregun Perëndimor të pushtuar.
Një burim raporton se të gjithë të vrarët ishin burra. Shumica e shkëmbimeve të zjarrit midis grupit të armatosur libanez Hezbollah dhe ushtrisë izraelite deri më tani është kufizuar në zonën kufitare, por Majfadun ndodhet 30 kilometra në veri të kufirit.
Forcat izraelite vranë gjithashtu katër persona në qytetin e pushtuar të Bregut Perëndimor të Jeninit, njoftuan shërbimet e urgjencës të martën, pas një nate dhune në të cilën katër të tjerë u vranë në qytetin Tubas pranë kufirit me Jordaninë.
Ushtria izraelite njoftoi se kreu dy sulme ajrore në Bregun Perëndimor, por nuk dha detaje të tjera.
Dhuna nuk ndalet, hakmarrja e Iranit pret
Gjysmëhëna e Kuqe Palestineze njoftoi se katër persona mbetën të vrarë në një sulm ndaj dy automjeteve në Jenin dhe një tjetër u plagos rëndë.
Sulmi erdhi në mes të një operacioni në Jenin që pamjet e mediave sociale treguan se përfshinte një kolonë automjetesh të blinduara dhe buldozerë që gërmonin rrugët.
Ndërsa Izraeli pret një sulm hakmarrës nga Irani pas vrasjes së liderit politik të Hamasit Ismail Haniyeh në Teheran javën e kaluar, dhuna në Bregun Perëndimor është një tjetër tregues i kërcënimeve me të cilat përballet Izraeli në disa fronte.
Forcat izraelite kanë vrarë qindra palestinezë në Bregun Perëndimor dhe Jerusalemin Lindor që nga fillimi i ofensivës në Rripin e Gazës. Shumë prej tyre kanë qenë luftëtarë të armatosur, por mes viktimave ka edhe të rinj që kanë hedhur gurë, si dhe civilë që nuk kanë qenë pjesë e konfliktit.
Në të njëjtën periudhë, sulmuesit palestinezë vranë 13 izraelitë. Të martën, një palestineze plagosi një oficere të policisë kufitare me një kaçavidë teksa inspektonte një autobus pranë Jerusalemit. Sulmuesi u vra.
