Sot në pikën transmetuese Zatriq, në komunën e Rahovecit, janë instaluar me sukses transmetuesit e rinj, me ç`rast është rritur edhe për 6 herë fuqia shpërndarëse e sinjalit të dy kanaleve të Radio Kosovës, në rajonin e Dukagjinit, në frekuencat 88.9 dhe 92.4 MHz.
Ky investim vjen pas instalimit të sistemit të ri të antenave në fillimvit kur ishte gjashtëfishuar fuqia transmetuese në rajonin e Dukagjinit.
Transmetuesit e instaluar sot kanë kapacitet prej 3,500 wat, ndërsa deri tani është operuar me fuqi të kufizuar prej 600 wat.
Instalimi i këtyre paisjeve mundëson rritjen e cilësisë së transmetimit, zgjerimin e mbulueshmërisë së territorit me sinjal dhe qasje shumëfish më të lartë të dëgjuesve nga komunat e rajonit të Pejës, në dy kanalet e Radio Kosovës që transmetojnë program në pesë gjuhë të komuniteteve etnike.
Në vazhdën e investimeve kapitale, fundjavën e kaluar është rritur për 50 herë fuqia transmetuese në Veri të Kosovës, në frekuencat 87.6 dhe 91.5 MHz ndërsa është rritur për 16 herë fuqia e transmetimit në rajonin e Anamoravës në frekuencat 88.5 dhe 90.5 MHz.
Kujtojmë se në fillim të këtij viti janë instaluar transmetues të rinj prej 5KW për dy kanalet e Radio Kosovës në Golesh, prej ku është dhjetëfishuar fuqia transmetuese në pjesën qendrore të Kosovës.
Pas 24 vjetësh mungese investimesh kapitale në Radio Kosovë, për më pak se një vit, është mbuluar pothuajse tërë territori i Kosovës me sinjal të radiove të transmetuesit publik.
