Qytetarët e Kosovës vazhdojnë të mos e respektojnë thirrjen institucionale “festo me zemër e jo me armë”, duke përdorur armët e zjarrit nëpër ahengjet familjare. Kështu polica nga rajoni i Ferizajt ka arrestuar një qytetar dhe ia ka konfiskuar armën.
“Policia e stacionit në Shtime me datën 06.08.2024 rreth orës 22:20 ka pranuar një informacion se në rrugën ” Afrim Selmanaj” në Shtime, në një aheng familjar kishte të shtëna me armë të zjarrit. Policët e rendit menjëherë janë nisur në atë drejtim dhe kanë arritur të identifikojnë personin: L.F (M/K) i moshës 21 vjeçar, tek i cili është gjetur arma, me të cilat dyshohet se ka shtënë gjatë ahengut”, thuhet në njoftimin e policisë.
Sipas kësaj të fundit, i dyshuari është shoqëruar në stacionin e policisë në Shtime dhe pas intervistimit nga policët hetues, me vendim të prokurorit kujdestar nga Prokuroria Themelore në Ferizaj është ndaluar në mbajtje për 48 orë për procedura tjera hetimore, ndërsa si prova materiale është sekuestruar arma (pistoletë).
Rasti është cilësuar “Përdorim i armës apo mjetit të rrezikshëm” dhe ” Mbajtje në pronësi, kontroll apo posedim i paautorizuar i armëve” , njofton policia.
Me këtë rast policia rajonale e Ferizajt falënderon qytetarët për bashkëpunim, ndërsa inkurajon edhe të tjerët që të bashkëpunojnë me policinë.
