Një delegacion nga Presidenca e Kosovës, i deleguar nga presidentja Vjosa Osmani mori pjesë në ceremoninë e Ditës Përkujtimore të Paqes në Hiroshimë, në 79-vjetorin e ngjarjes.
“Një delegacion nga Presidenca e Kosovës, i deleguar nga presidentja Vjosa Osmani, i udhëhequr nga këshilltarët e saj, Dora Musa dhe Bekim Kupina, bashkë me Kryetarin e Drenasit, Ramiz Lladrovci dhe atë të Istogut, Ilir Ferati po qëndrojnë prej dy ditësh në Hiroshimë të Japonisë, në ceremoninë e Ditës Përkujtimore të Paqes të organizuar nga Kryetari i Hiroshimës”, njofton Presidenca e Kosovës.
Në këtë ngjarje po marrin pjesë 100 përfaqësues të shteteve nga gjithë bota, teksa delegacioni nga Kosova pati rastin të takohet dhe me nxënës të shkollave të mesme nga Hiroshima, të cilët kishin përpiluar mesazhet e tyre të paqes.
“Delegacioni nga Presidenca pati mundësinë të dëgjojë edhe rrëfime të të mbijetuarve të Hiroshimës dhe ta vizitojë vendin në të cilin ishte hedhur bomba atomike. Nga aty, krahas përfaqësuesve të shumë shteteve, delegacioni nga Kosova dërgoi mesazhe paqeje për qytetarët e Hiroshimës, duke uruar që bota të mos përjetojë kurrë më ngjarje sikurse kjo”, thuhet në njoftim.
Gjithashtu kryetarj i Hiroshimës, Kazumi Matsui ka pritur në një takim zyrtar delegacionin e Presidencës. Këshilltarët e Presidentes Osmani, ndër të tjera, e kanë njoftuar Matsui mbi iniciativat e Kosovës për ruajtjen dhe kultivimin e paqes, me theks të veçantë në angazhimin e Presidentes Osmani në avancimin e Agjendës për Gratë, Paqen dhe Sigurinë.
Në takim, ndër të tjera është diskutuar për mundësitë e bashkëpunimit me komunat kosovare, teksa kryetari Matsui ka ftuar kryetarët e Drenasit dhe Istogut që t’i bashkohen Rrjetit global të paqes “Mayors for Peace”. /Kosovatimes/
