Qindra qytetarë të komunitetit serbë po protestojnë në Mitrovicën e veriut kundër hapjes së urës së Ibrit, e cila që nga paslufta ka qenë e mbyllur për qarkullimin e automjeteve.
Protesta nuk është masovike dhe po zhvillohet e qetë, me fjalimin e disa pjesëmarrësve.
Në mesin e protestuesve shihen transparente të tilla si: “Në urë e kemi mbrojtur mbijetesën, tani mbrojmë zhdukjen”, “Nëse Kurti e hap urën, KFOR-i dhe QUINT-i do të jenë përgjegjës për gjithçka” etj.
Në protestë shihet edhe kryetari i Listës Serbe, Zllatan Ellek dhe anëtarët e kësaj liste Igor Simiq dhe Slavko Simiq.
Serbët bëjnë përgatitjet për protestë afër urës së Ibrit
(Plotësuar, 10.25) Organizatorët e protestës së paralajmëruar në Mitrovicë të veriut po i bëjnë përgatitjet për fjalime në hapësirën afër urës së Ibrit, në pjesën veriore.
Përveç Policisë së Kosovës, e cila është prezente në afërsi të lokacionit ku do të mbahet protesta, shihen edhe pjesëtarë të Eulex-it dhe KFOR-it.
Lista Serbe u bën thirrje qytetarëve serbë për dalje në protestë
(Plotësuar, 9:20) Në prag të protestës së paralajmëruar për në orën 11:00 nga serbët lokal në Mitrovicën e veriut, RTK nga burimet veta ka mësuar se Lista Serbe në vazhdimësi po u bënë thirrje qytetarëve në veri që të dalin në protestë në numër sa më të madh.
Sipas Policisë së Kosovës, protesta është paralajmëruar nga një grup i qytetarëve të komuniteti serb në veri të Mitrovicës, derisa janë ndërmarrë të gjitha masat e nevojshme për të mbajtur rendin dhe qetësinë publike.
Pjesëtarë të EULEX-it e KFOR-it vendosen mbi objektet afër urës së Ibrit
(Plotësuar, 8:20) Mbi objektet në afërsi të urës së Ibrit qysh në orët e mëngjesit janë vendosur pjesëtarë të EULEX-it dhe të KFOR-it, ndërsa ekspertët për matjet e stabilitetit të urës të kontraktuar nga qeveria deri tani ende nuk janë parë te kjo urë.
Ndërkohë, në orën 11:00 është paralajmëruar një protestë nga serbët lokal, të cilët e kundërshtojnë hapjen e urës së Ibrit, e cila është e mbyllur për qarkullim të veturave që nga përfundimi i luftës në Kosovë.
