Një aeroplan me 62 individë në bord u rrëzua në një zonë banimi në shtetin Sao Paulo të Brazilit të premten. Njoftimi u bë nga kompania ajrore, por nuk ishte e qartë se sa njerëz u plagosën ose u vranë.
Kompania ajrore ‘VoePass’ konfirmoi në një deklaratë se një aeroplan që fluturonte drejt aeroportit ndërkombëtar të Sao Paulos, u rrëzua në qytetin Vinhedo me 58 pasagjerë dhe 4 anëtarë të ekuipazhit në bord.
Në deklaratë nuk thuhet se çfarë e shkaktoi aksidentin.
Ndërsa merrte pjesë në një ngjarje në Brazilin jugor, Presidenti Luiz Inácio Lula da Silva i kërkoi turmës të qëndronte në këmbë dhe të mbante një minutë heshtje ndërsa ai njoftoi për aksidentin. Ai tha se dukej se të gjithë pasagjerët dhe ekuipazhi në bord kishin vdekur, pa dhënë detaje të tjera.
Zjarrfikësit, policia ushtarake dhe autoriteti i mbrojtjes civile dërguan ekipe në vendin e aksidentit, në Vinhedo.
Rrjeti brazilian ‘GloboNews’ transmetoi imazhet e një zone banimi që ishte përfshirë nga flakët dhe tymi që dilte nga trupi i avionit. Vendi i aksidentit dukej si një zonë banimi me plot shtëpi. Në një video tjetër të transmetuar nga ‘GloboNews’ shihej një avion që binte poshtë vertikalisht.
