NAGASAKI sot shënoi 79 vjetorin e sulmit me bombë atomike amerikane në atë qytet dhe Izraeli nuk ishte i ftuar në ceremoni për shkak të ofensivës në Rripin e Gazës, raportojnë agjencitë.
Në orën 11:02 të mëngjesit me orën lokale, pikërisht në momentin kur një B-29 amerikan hodhi një bombë në Nagasaki në vitin 1945, qyteti filloi një minutë heshtje.
Kryebashkiaku i Nagasaki: Japonia duhet të marrë një qëndrim serioz për një botë pa armë bërthamore
“Qeveria e Japonisë, i vetmi vend i sulmuar nga një bombë atomike në luftë, duhet të mbajë një qëndrim serioz për një botë pa armë bërthamore,” tha në ceremoni kryebashkiaku i Nagasaki Shiro Suzuki.
“Si një hap drejt kësaj, ne i bëjmë thirrje qeverisë japoneze që të nënshkruajë dhe ratifikojë Traktatin për Mospërhapjen e Armëve Bërthamore sa më shpejt të jetë e mundur”, shkruan e përditshmja japoneze Mainichi.
Izraeli i paftuar
Nagasaki vendosi t’i mohojë Izraelit një ftesë për përkujtimore, pavarësisht presionit nga anëtarët e G7. Kryebashkiaku tha se ky vendim është marrë për sigurinë dhe paqen gjatë ngjarjes dhe theksoi se nuk ishte “i motivuar politikisht”.
Prandaj, ambasadori amerikan në Japoni Rahm Emanuel dhe ambasadorja britanike Julia Longbottom vendosën të bojkotojnë ceremoninë.
The Guardian shkruan se Emanuel vendosi ta bëjë këtë për shkak të “politizimit” të ngjarjes dhe shton se në vend të kësaj ai do të marrë pjesë në një ceremoni në një tempull budist në Tokio për nder të viktimave të sulmit në Nagasaki.
Tokio zyrtare nuk ka dashur të komentojë vendimin e Nagasakit për të mos ftuar Izraelin
Longbottom tha se mohimi i një ftese për Izraelin “krijon një rreshtim fatkeq dhe mashtrues me Bjellorusinë dhe Rusinë”, dy vende të tjera që nuk ishin ftuar në përkujtim, as në Nagasaki dhe as më parë në Hiroshima, e cila kishte ftuar Izraelin.
Qeveria në Tokio nuk deshi të komentojë vendimin e Nagasakit për të mos ftuar Izraelin. Të dërguarit e Britanisë së Madhe, Kanadasë, Francës, Gjermanisë, Italisë, SHBA-së dhe BE-së thanë në një letër drejtuar autoriteteve të qytetit në mes të korrikut se “do të jetë shumë e vështirë” për ta që të marrin pjesë në një nivel të lartë në ngjarje nëse Izraeli nuk është i pranishëm.
Të martën, Hiroshima shënoi 79 vjetorin e sulmit me bombë atomike.
