Tashmë është zyrtare. Genc Bujupi dhe Getoar Bujupi, dy gjyqtarët e Federatës së Hendbollit të Kosovës, do t’i shohim duke drejtuar ndeshje evropiane të klubeve dhe ekipeve kombëtare.
“Çifti i gjyqtarëve Bujupi tashmë edhe zyrtarisht kanë licencën e EHF-së dhe vetëm pritet fillimi i edicionit të ri garues në Evropë për delegimet e para. EHF-ja të premten njoftoi zyrtarisht se 13 çifte gjyqtarësh morën licencën e “EHF Referee”. Kurset e fundit janë mbajtur në Prishtinë dhe në Drammen të Norvegjisë. Genc e Getoar Bujupi kanë qenë në programin e EHF-së, Young Referee Programme, ndërsa në hendbollin kosovar ka shumë vjet që janë prej gjyqtarëve kryesorë”, thuhet në njoftimin e Federatës së Hendbollit të Kosovës.
Sipas këtij njoftimi, ata kanë drejtuar me shumë sukses ndeshje të shumta në Evropianin U20 për hendbollistë që u mbajt muajin e kaluar në Prishtinë.
Është ky një tjetër sukses i Federatës së Hendbollit të Kosovës që sërish i ka katër çifte gjyqtarësh me thirrje të EHF-së.
