Dogana e Kosovës ka konfiskuar bizhuteri dhe koncentrat për parfume në një autobus, i cili po udhëtonte nga Luksemburgu në drejtim të Prishtinës, në pikë kalimin kufitar të Merdare.
Përmes rrjetit social ‘Facebook’, Dogana e Kosovës njofton se gjatë kontrollit rutinor, shoferët e autobusit iu përgjigjën negativisht pyetjes së zyrtarëve doganorë nëse kishin ndonjë mall për të deklaruar, mirëpo pas një kontrolli më të detajuar, zyrtarët e Doganës zbuluan dy qese të fshehura në pjesën e pasme të kapakëve të autobusit.
“Në njërën qese u gjetën bizhuteri të padeklaruara, përkatësisht: 468 copë bizhuteri të ndryshme, në qesen tjetër u gjetën shishe me koncentrat për parfume: 6 kg të koncentratit për parfume”, njofton Dogana e Kosovës, duke bërë të ditur se vlera e mallrave të ndaluara është afro 1000 euro.
Tutje Dogana e Kosovës konfirmon se vazhdon të angazhohet në parandalimin e kontrabandës dhe në sigurinë e kufijve, duke garantuar që çdo mall të trajtohet sipas ligjeve dhe rregullave të aplikueshme. /Kosovatimes/
