Ka vazhduar edhe të premten përplasja në distancë mes kryetarit të Prishtinës, Përparim Rama me Lëvizjen Vetëvendosje, në Prishtinë. Rama shkroi në rrjetin social, se janë duke i shqyrtuar 5 projekte për sheshin Adem Jashari, në Prishtinë, derisa thotë se Vetëvendosje nuk i kishte bërë për 8 vjet udhëheqje. E shefi i asamblistëve të Vetëvendosjes, ia ktheu se nuk duhet të abuzohet me paranë publike dhe duhet të mbahen premtimet.
Në reagimin e kryetarit të Prishtinës, Përparim Rama, thuhet se për tetë vjet, Vetëvendosje e ka udhëhequr Prishtinën dhe ka dështuar ta realizojnë projektin e sheshit Adem Jashari, në Prishtinë. Ai tha se pasi ka marrë detyrën, ka kërkuar zhvillimin e sheshit “Adem Jashari”, në Prishtinë, dhe tani pesë projektet e përzgjedhura u janë prezantuar përfaqësuesve të familjes Jashari, më 9 korrik 2024.
Ai përmendi se në vitin 2010, në shenjë nderimi dhe respekti për familjen Jashari, ka zhvilluar dhe dorëzuar një projekt për Kompleksin Memorial në Prekaz me vetiniciativë dhe pa asnjë kompensim financiar.
Duke adresuar kritika ndaj Vetëvendosjes, në Prishtinë, Rama shkroi se kjo arrihet me punë duke lartësuar vlerat tona, e jo me fjalë boshe e propagandë.
Kurse reagimit të Ramës, iu kundërpërgjigj shefi i asamblistëve në Prishtinë, Gëzim Sveçla.
Sipas tij, kryetari Rama gjatë fushatës zgjedhore s’e ka ditur as ku është sheshi “Adem Jashari”. Ai i tha Ramës se “moral dhe vlerë është edhe mos të abuzohet me taksa të qytetarëve të Prishtinës, e të mbahen premtimet”.
