Shkruan: Florim ZEQA
I motivuar nga titulli i shkrimit, u ktheva në kohë 34 vite më parë, në vitet e krenarisë kombëtare, në aktivitetet atdhetare kur e parapëlqeja të më quanin ‘ushtar i lirisë’ në vend të postit politik që mbaja asokohe (anëtarë i kryesisë dhe nënkryetar) në Degën e Forumit Rinor të LDK-së në Klinë.
I palëkundur në rrugën e filozofisë politike rugoviane
Asnjëherë në jetën time nuk kam vrapuar pas posteve dhe privilegjeve. Kam vepruar çdo herë dhe do të veprojë edhe në të ardhmen për të mirën e popullit dhe atdheut tim të shenjt.
I kam shërbyer çështjes kombëtare dhe lirisë së atdheut tim, këtë do ta bëjë deri në frymën e fundit, varësisht prej rrethanave dhe vullnetit të (qytetarëve) bashkatdhetarëve.
Pas ri-shpalljes së pavarësisë së vitit 2008, në prag të të gjitha proceseve zgjedhore nga viti 2010 e këndej kam pasur oferta nga subjekte të skenës politike, me përjashtim të subjektit të zemrës (LDK), të cilët asnjëherë nuk janë kujdesur për avancimin e veprimtarëve dhe aktivistëve të saj besnik në Kosovë dhe në Diasporë, por gjithnjë janë përkujdesur për rehatimin e militantëve dhe familjarëve të vet, të servilve dhe puthadorëve të pushtetit.
Humbja e “rasteve” për t’u ngritur në karrierë politike ndodhi shkaku pse unë dëshiroja t’i qëndrojë besnik idealit tim jetësorë, pse unë dëshiroja të qëndrojë i palëkundur në rrugën e filozofisë politike rugoviane.
Pas shkuarjes në amshim të liderit historik Ibrahim Rugova, për të mos thënë e paarritshme, është vështirësuar tej mase mundësia për ta rikthyer LDK-në në zonjë të skenës politike, me vlera e parime të shëndosha siç ishte në vitet e ’90-ta!
LDK-ja u nda dhe u fragmentizua disa herë nga ajo kohë derisa ra në kuotat më të ulëta historike nga themelimi i saj(12 %). Secili grupim i ndarë politik thirret në vazhdimësinë rugoviane, por asnjëri prej tyre nuk e përfaqëson filozofinë politike rugoviane.
Jam ndër të paktët analist dhe gazetarë që ende mendojnë për të ruajtur vazhdimësinë rugovine në LDK, por, çdo ditë e më shumë po mbetem i vetmuar, pasi të tjerët që moti janë larguar prej saj dhe janë rreshtuar nëpër subjekte të tjera politike.
Edhe nëse mbetëm i vetëm, do të vazhdoj rrugëtimin tim në mbështetje të ADN-së politike kosovare dhe filozofisë politike rugoviane, pasi LDK është i vetmi burim i pastër politik në këto tre dekadat e fundit.
Me ndihmën e Zotit dhe qytetarëve (bashkatdhetarëve) të vendit tim, do ta gjejë mënyrën dhe rrugën e veprimit për reformimin e LDK-së, fillimisht në komunën e Klinës, për ta përhapur më pastaj formulën e ndryshimit gjithandej Kosovës.
Zoti e bekoftë Republikën e Kosovës!
Zoti e bekoftë filozofinë politike rugoviane!
Zoti i bekoftë qytetarët e vendit tim!
