Zëdhënësi i Bashkimit Evropian, Peter Stano ka pranuar se urat janë për t’i bashkuar njerëzit, por nuk e ka mbështetur idenë e Qeverisë së Kosovës për hapjen e urës së Ibrit në Mitrovicë. Ai, ka thënë se BE nuk mund t’ua imponojë e as t’i detyrojë Kosovën e Serbinë për pajtim, por ka thënë se ato duhet ta bëjnë këtë nëse duan të jenë pjesë e BE-së.
“Urat zakonisht i bashkojnë njerëzit. Fatkeqësisht, situata që kemi në veri të Kosovës dhe në Mitrovicë është rezultat i një numri të madh rrethanash të vështira politike. Prandaj, kemi thënë gjithmonë se është një çështje shpërthyese, një çështje problematike dhe si të gjitha çështjet problematike duhet të zgjidhet me dialog. Sepse nëse keni një problem, atëherë e zgjidhni me dialog, jo me vendime të njëanshme”, ka theksuar Stano në një intervistë për televizionin N1 në Beograd.
Ai tutje ka thënë se Bashkimi Evropian dhe miqtë e Kosovës (SHBA dhe shtetet e QUINT-it) shkuan te kryeministri Kurti dhe i kërkuan të mos e bëjë një veprim të tillë. “Ata i thanë: Mos e bëj këtë, mos bëj lëvizje të njëanshme, mos e hap urën. Por, ai duket i vendosur ta bëjë këtë. Prandaj, ne thamë ‘jo, do të ketë efekte shumë negative’. Ne i kërkojmë Qeverisë të parandalojë dhe shmang hapat që do të çojnë në konfrontime dhe përshkallëzim më të madh. Sepse i lëndon njerëzit në terren dhe ju dhemb edhe juve, sepse Kosova është nën masat e BE-së dhe nën disa masa të SHBA-së për shkak të përsëritjes së lëvizjeve të dëshmuara që çojnë në përshkallëzim. Kjo nuk i ndihmon askujt, përkundrazi, ndikon shumë negativisht te një numër i madh njerëzish”, shtoi Stano.
Tutje, ai, ka shprehur shqetësimin për krizën e vazhdueshme në dialogun Kosovë-Serbi. Ai kritikoi veprimet e njëanshme.
“Ne kemi shpresuar në fillim të këtij mandati, kur kemi iniciuar vazhdimin e dialogut, se do të kemi progres, se do të jemi në gjendje t’i ndihmojmë Serbisë dhe Kosovës të arrijnë një progres në normalizim. Fatkeqësisht, ne shohim gjithnjë e më shumë lëvizje të njëanshme dhe veprime të pakoordinuara. Fatkeqësisht, shumica e tyre vijnë nga autoritetet në Prishtinë. Ne duam të shohim angazhim dhe dialog në vend të lëvizjeve të njëanshme”, tha ai.
Stano theksoi se Bashkimi Evropian nuk është një forcë ndërhyrëse dhe nuk ua imponon partnerëve të saj “gjëra që popullata vendase, mund t’i konsiderojë si ndërhyrje në punët e brendshme”.
“Pikërisht për këtë ne punojmë si ndërmjetës në dialog. Ndërmjetësi është si një mësues i mirë, i cili përpiqet të bëjë që dy nxënës kokëfortë të arrijnë ndonjë rezultat. Në këtë rast, ata të fillojnë të trajtojnë njëri-tjetrin normalisht. Ne këtë nuk mund t’ua imponojmë. Nëse nuk duan – na vjen keq. Nuk do të përparojnë, por do ta ndëshkojnë veten dhe do të ndëshkojnë popujt e tyre dhe nuk do t’i afrohen BE-së. Sepse ata vetë thanë: ‘Ne duam të jemi pjesë e klubit tuaj evropian’. Pastaj Bashkimi Evropian tha: ‘Në rregull. Këto janë kushtet dhe ju lutemi plotësoni ato. Nëse nuk i plotëson, nuk do të jesh pjesë e klubit’”, tha Stano.
Ai tutje tha se Serbia dhe Kosova kanë thënë se duan të bashkohen me BE-në, por tani duhet t’i ndjekin rregullat dhe rregullat sipas tij thonë se kërkohen marrëdhënie të mira fqinjësore.
“Nëse nuk i keni, atëherë duhet të punoni për pajtim dhe normalizim. Ne do të ndihmojmë. Dhe ne vazhdojmë të ndihmojmë, sepse besojmë se mund të funksionojë. Më parë ka funksionuar me anëtarët e tjerë që janë tani në BE, por që më herët kishin luftuar në luftëra shumë më brutale se ajo mes serbëve dhe kosovarëve. Dhe ia dolëm. Por kjo kërkon guxim, pjekuri dhe kërkon lidership politik, i cili do të arrinte kompromisin e nevojshëm. Kjo është ajo që ne po përpiqemi t’i ndihmojmë të dyja palët të arrijnë. Por ne nuk do t’u imponojmë atyre. Sepse nëse ata nuk e duan, atëherë ne nuk mund të dëshirojmë pajtim mes Kosovës dhe Serbisë më shumë seç e duan Kosova dhe Serbia dhe liderët e tyre. Prandaj ne vetëm mund të ndihmojmë dhe këshillojmë, por nuk mund t’ua imponojmë apo t’i detyrojmë ta bëjnë këtë”, nënvizoi Stano.
