Kryetari i Komunës së Mitrovicës, Bedri Hamza, ka vizituar ekspozitën e artistit të famshëm shqiptar, Petrit Halilaj, të quajtur “Abetare” në Shtetet e Bashkuara të Amerikës.
“Petrit Halilaj, djaloshi nga Runiku i Drenicës, nga kampet e refugjatëve gjatë luftës në Kosovë ka arritur majat e artit botëror. Në mes takimeve të shumta, ndjeva obligim dhe kënaqësi të veçantë të gjej pak kohë ta vizitoj Muzeun Metropolitan, ku Petriti ka ekspozitë të madhe personale me titull shqip ‘Abetare’, inspiruar nga vizatimet në bankat e shkollave në Kosovë e Ballkan”, ka shkruar ai në Facebook.
Tutje Hamza ka thënë se ndjehet krenar me Halilajn dhe artistët e sportistë e tjerë që vendosin emrin e Kosovës në galeri, arena sportive dhe ballina të gazetave më të njohura.
Ndryshe artisti Petrit Halilaj është i njohur për veprat e tij ndërkombëtarisht, të cilat shumicën e kohës janë me motive kosovare, specifikisht të buruara nga Runiku.
Një nga veprat e tij më të përfolura kohëve të fundit ka qenë “Kur dielli do të lind sërish, do ta pikturojmë qiellin”, e cila është e vendosur në hotelin ikonik “Grand” në Prishtinë, gjatë Biennales Ndërkombëtare “Manifesta” kur zbarkoi në Kosovë. /Kosovatimes/
