Irani do të “mbajë përgjegjësi” për çdo sulm kundër Izraelit “që do të çonte në një përshkallëzim të tensioneve në rajon” dhe që do të kërcënonte mundësinë e arritjes së një marrëveshjeje për një armëpushim dhe lirimin e pengjeve nga Rripi i Gazës. Thuhet në një deklaratë të përbashkët Britania e Madhe, Franca dhe Gjermania.
Kryeministri britanik Keir Starmer, presidenti francez Emmanuel Macron dhe kancelari gjerman Olaf Scholz i bënë thirrje Iranit “dhe satelitëve të tij” që të përmbahen nga sulmet, duke shtuar se ata pajtohen me vendet ndërmjetësuese, përkatësisht SHBA, Egjiptin dhe Katarin, se nuk duhet të ketë më shumë vonesa në negociatat mes Hamasit dhe Izraelit, raporton Politico.
Më parë, portali Axios raportoi se shërbimet izraelite të sigurisë besojnë se një sulm nga Irani në atë vend mund të ndodhë në ditët në vijim.
