Një zjarr në pyll i nxitur nga erërat e forta të furishme po shpërthen drejt Athinës, duke djegur pemë, shtëpi dhe makina dhe duke detyruar evakuimin e spitaleve dhe të paktën 11 qyteteve dhe fshatrave, thanë autoritetet greke.
Qindra zjarre në pyje kanë shpërthyer në të gjithë Greqinë që nga maji. Megjithëse zjarret e verës janë të zakonshme në Greqi, moti jashtëzakonisht i nxehtë dhe i thatë i lidhur me ndryshimet klimatike i ka bërë zjarret më të shpeshta dhe më intensive, thonë shkencëtarët.
Më shumë se 560 zjarrfikës të mbështetur nga vullnetarë, 17 avionë bombardues me ujë dhe 15 helikopterë po luftojnë me zjarrin e fundit pyjor që shpërtheu dje në orën 15:00 me orën lokale pranë Varnavas, 35 km në veri të kryeqytetit.
Deri në mëngjesin e sotëm zjarri ishte përhapur në jug dhe po digjej në disa fronte duke përfshirë fshatin Grammatiko, qytetin antik të Maratonës, komunën bregdetare të Nea Makri dhe malin Penteli në veri të Athinës.
Erërat e forta ndryshojnë vazhdimisht drejtimin e flakëve. “Megjithë luftimet e ashpra dhe përpjekjet mbinjerëzore gjatë natës, zjarri u përhap shumë shpejt dhe arriti në malin Penteli”, tha një zyrtar i zjarrfikësve.
Avionët zjarrfikës pezulluan operacionet gjatë natës dhe rifilluan përpjekjet të hënën në mëngjes. Policia ndihmoi në evakuimin dhe disa banorë e kaluan natën në strehimore.
Të paktën tre spitale u evakuuan
Të paktën tre spitale në Penteli janë evakuuar. Zjarri, me flakë të larta deri në 25 metra, u përhap “si rrufe” për shkak të erërave të forta, tha të dielën zëdhënësi i departamentit të zjarrit Vassilis Vathrakogiannis.
Re të dendura tymi errësuan qiellin mbi Athinë mbrëmjen e së dielës. Disa orë më vonë, flakët po digjeshin pranë periferisë së Dionysos, rreth 23 km në verilindje të qendrës së qytetit dhe zonave përreth.
Kryeministri Kiriakos Mitsotakis u kthye me nxitim në Athinë nga një pushim fundjavë në ishullin e Kretës për të mbikëqyrur reagimin ndaj zjarrit, tha një zyrtar qeveritar, me kujtimet ende të freskëta nga zjarri i vitit 2018 që vrau 104 njerëz në qytetin bregdetar të Matit, afër kryeqytetit. .
Meteorologët: Kjo do të jetë një javë shumë e vështirë
Pas dimrit më të ngrohtë të regjistruar dhe periudhave të gjata me pak ose aspak reshje, Greqia parashikohet të ketë verën e saj më të nxehtë ndonjëherë. Autoritetet janë në gatishmëri të lartë për zjarret deri të enjten, me ekspertët e motit që paralajmërojnë një “javë shumë të vështirë”.
“Gjysma e Greqisë do të jetë në të kuqe,” tha të shtunën Ministri i Krizave Klimatike dhe Mbrojtjes Civile Vasilis Kikilias, duke përmendur temperaturat rreth 40 gradë Celsius dhe erërat e forta.
