Zëvendëskryeministri dhe ministri i Punëve të Brendshme, Ivica Daçiq, duke i cilesur si monstroze deklaraten e Bekim Haxhiut për vrasjen e policëve serbë tha se është një njoftim ogurzi i terrorit dhe të së keqes që do të zbatohet ndaj të gjithë serbëve, veçanërisht atyre që jetojnë në Kosovë.
“Glorifikimi më monstruoz i terrorizmit dhe vrasja e një polici serb, nga Bekim Haxhiu, është vetëm dëshmi se urrejtja dhe dhuna ndaj çdo gjëje serbe nuk ka kufi. Nuk mund të them se jam i befasuar nga thirrja e Haxhiut për të vrarë policët serbë, madje as që e ka thënë publikisht. Do të habitesha vetëm nëse një deklaratë e tillë monstruoze do të mbetej pa reagim nga bashkësia ndërkombëtare dhe të gjitha institucionet e saj përkatëse”, tha Daçiq.
“Shteti i Serbisë është përgjegjës, i përkushtohet politikës së paqes dhe stabilitetit dhe është i vendosur në një nga detyrat më të rëndësishme të çdo shteti, që është mbrojtja e qytetarëve nga terrorizmi dhe ekstremizmi. Anëtarët e Ministrisë së Punëve të Brendshme, së bashku me shërbimet e tjera të sigurisë, nuk kanë frikë nga deklaratat infantile të politikanëve amatorë të një shteti inekzistent dhe do të kundërshtojnë çdo përpjekje për terrorizëm me të gjitha forcat e tyre dhe do të mbrojnë qytetarët e tyre, vendin e tyre dhe paqen dhe stabilitetin e atdheut tonë”, tha Daçiq.
Deputeti i Partisë Demokratike të Kosovës, Bekim Haxhiu, duke komentuar varrimin e Faton Hajrizit, vrasësit të policit serb Nikolla Krsmanoviq në Loznicë, në një postim në rrjetet sociale ka shkruar se çdo person që vret një polic serb meriton respektin e tij.
