Sadri Ferati, ish-ministër i Pushtetit Lokal, nga radhët e LDK-së, në ‘InfoPlus’, ka folur për hapjen e Urës mbi Ibër, dhe për situatën e sigurisë dhe politike në vend. Ai tha se për hapjen e Urës mbi Ibër, duhet të koordinohemi me ndërkombëtarët duke kërkuar të drejtën tonë, që Kosova të funksionojë me sistem unik, të shtrihet sovraniteti.
Ferati ka deklaruar se shtrirja e sovraniteti të Kosovës, funksionalizimi i institucioneve të saj e krijimin e lëvizjes së lirë edhe mbi urën, janë kërkesa dhe nevoja të kahershme, duke shtuar se në këtë drejtim Qeveria ka kërkesë plotësisht legjitime dhe të pranueshme.
“Ajo që krijon një ngarkesë a shqetësim te ne është që ajo duhet të bëhet, por që duhet reflektuar qartë se kjo nuk duhet drejtuar kundër askujt dhe që nuk cenon asnjë të drejtë e asnjë perspektivë të komunitetit serb në veri dhe për ta arritur këtë, atëherë duhet një koordinim me bashkësinë ndërkombëtare në kapacitetet të ndryshme dhe ato politike, sidomos në ato të sigurisë, pra KFOR-in dhe EULEX-in. Kjo është më se e domosdoshme”, ak thënë Ferati.
Ndërsa lidhur me bashkërendim të ministrave të qeverisë me institucionet e sigurisë, Ferati tha se kjo është në nivelin e informimit të palëve të ndërsjellë, duke vënë theksin se deri më tani nuk ka një koordinim rreth vendimit për hapjen e urës.
“Sa i përket vendimit që në mënyrë të njëanshme ta lirojnë urën, deri tash ky është informacioni dhe deklaratat nga KFOR-i, EULEX dhe ambasadat e huaja, deklarojnë se nuk ka një koordinim rreth vendimit për lirimin e urës”, ka theksuar Ferati.
Se a duhet dialoguar në Bruksel, për hapjen e urës, Ferati tha se duhet krijuar klima ku edhe Vuçiqi dhe të tjerët duhet pajtuar për një normalizim të jetës së qytetarëve ne veri të vendit dhe “nëse dialogu është rezultativ, atëherë është rruga më e mirë që duhet ndjekur”.
Ferati, tutje, potencoi se bashkëpunimi me ndërkombëtarët, që kanë shumë merita në ecjen e Kosovës deri në këtë kohë, duhet të kultivohet dhe ruajtur, sepse, sipas tij, bashkëpunimi me ta do të na duhen në të ardhmen.
Freati porosit qeverinë që të mos përsërisë gabimet sikurse në të shkuarën, duke përmendur tabelat, kur qeveria bëri hap prapa.
“Duhet të koordinohemi me ndërkombëtarët, duke kërkuar të drejtën tonë, duke kërkuar që Kosova të funksionojë me sistem unik, të shtrihet sovraniteti, të shtrihet funksionalizimi i institucioneve, duke përfshirë edhe vet urën dhe në momente kur ajo ndodhë e koordinuar, atëherë kjo nënkupton që kjo nuk krijon probleme”, ka thënë mes tjerash Ferati.
